"Челси" ярим ҳимоячиси Энзо Фернандеснинг Испания пойтахтига ташрифидан сўнг унинг келажаги борасида турли хабарлар тарқалди. Аргентина терма жамоаси аъзоси Мадрид Очиқ чемпионатида "Реал Мадрид" юлдузи Жуд Беллингем билан кўришгани акс этган видео мухлислар орасида тезда оммалашди. Бу ҳақда Goal.com хабар беради.
Фернандеснинг агенти Хавьер Пасторе ўз мижози Мадрид клубига ўтишга ҳаракат қилаётгани ҳақидаги даъволарни рад этди. Унинг таъкидлашича, футболчи фақат "Челси"даги мавсумни муваффақиятли якунлашга эътибор қаратган.
"Кўп нарса айтилмоқда, аммо аслида ҳеч нарса рўй бераётгани йўқ. Унинг Испанияга тез-тез бориши фақат шахсий сабабларга боғлиқ", деди Пасторе.
Агентнинг қўшимча қилишича, Энзонинг Мадридда дўстлари бор ва у бўш вақтини ўша ерда ўтказишни ёқтиради.
Пасторе футболчининг "Челси"даги ўзгарувчан ролига ҳам тўхталиб ўтди. Унинг айтишича, Фернандес турли мураббийлар қўл остида ҳам ҳужумкор, ҳам ҳимоявий позицияларда ўйнай оладиган универсал футболчи ҳисобланади.
Хабарларга кўра, агар катта миқдордаги таклиф тушса, Лондон клуби футболчини сотиш имкониятини кўриб чиқиши мумкин. 2023 йилда "Бенфика"дан 106,8 миллион фунт стерлинг эвазига харид қилинган Фернандес ҳамон футбол тарихидаги энг қиммат ўйинчилардан бири бўлиб қолмоқда.
“Zamin”ни Telegram'да ўқинг!
