Диего Симеоне бошчилигидаги «Атлетико Мадрид» «Арсенал»га қарши кечган драматик баҳсдан кейин мусобақа билан хайрлашди. Учрашув 1:1 ҳисобида якунланган бўлса-да, илк ўйиндаги мағлубият мадридликларнинг кейинги босқич орзусига нуқта қўйди. Ўйиндан сўнг жамоа бош мураббийи Диего Симеоне ҳиссиётларга бой фикрлар билдирди.
Аргентиналик мутахассис аввало ўз шогирдларининг ҳаракатини юқори баҳолади ва жамоа бу мавсумда кутилгандан ҳам яхшироқ йўл босганини таъкидлади. Унинг фикрича, «Атлетико Мадрид» майдонда барча имкониятни ишга солган, аммо ҳал қилувчи паллаларда омад рақиб томонда бўлган.
— «Биз жуда яхши кампания ўтказдик. Футболчилар барча кучини берди, охиригача курашди. Ростини айтсам, кўпчилик кутганидан ҳам узоқроқ йўл босдик. Афсуски, футбол шундай — баъзан катта меҳнат ҳам исталган натижани бермайди», — деди Симеоне.
Мураббий биринчи учрашувда ҳам жамоаси етарлича хавфли вазиятлар яратганини, аммо улардан самарали фойдаланишнинг иложи бўлмаганини эслаб ўтди. Унинг айтишича, жавоб баҳсида айниқса иккинчи бўлимда мадридликлар ташаббусни қўлга олган.
— «Биринчи ўйинда ҳам гол уриш учун имкониятларимиз бор эди, аммо якунда совуққонлик етишмади. Бугун эса иккинчи бўлимда кўпроқ рақиб майдонида ҳаракат қилдик, босим ўтказдик, вазиятлар яратдик. Лекин футболда баъзан майда деталлар ҳал қилувчи аҳамият касб этади. Айрим пайт омад сен томонда бўлади, айрим пайт эса аксинча», — дея фикр билдирди тажрибали мураббий.
Симеоне ҳакамлик мавзусига ҳам тўхталди, аммо бу ҳақда ортиқча баҳона қидиришни истамаслигини билдирди. У рақиб жамоани муносиб тарзда табриклади.
— «Ҳакамлик ҳақида айтадиган ортиқча гапим йўқ. Биз мусобақани тарк этдик ва буни қабул қилишимиз керак. «Арсенал»ни табриклайман — улар яхши жамоа эканини яна бир бор кўрсатди», — деди у.
Шу билан бирга, Симеоне «Арсенал»нинг ҳозирги лойиҳаси ва ўйин услубига ҳам юқори баҳо берди. У айниқса жамоанинг барқарор ривожланаётганини алоҳида таъкидлади.
— «Менга уларнинг жамоаси ҳам, мураббийи ҳам ёқади. Уларда аниқ тизим ва барқарор ёндашув бор. Бу эса катта молиявий имкониятлар билан қўллаб-қувватланяпти. Бундай ҳолатда рақобат қилиш осон эмас. Лекин биз ҳам тўхтаб қолмаймиз, ишлашда давом этамиз», — деди Симеоне.
Бу мағлубиятга қарамай, «Атлетико Мадрид» мухлислари жамоанинг жанговор руҳини юқори баҳоламоқда. Симеоне бошчилигидаги мадридликлар яна бир бор характер ва матонат намойиш этиб, охиригача курашишдан воз кечмаслигини кўрсатди.
“Zamin”ни Telegram'да ўқинг!
