Ўзбекистон шахматининг ёрқин вакили Жавоҳир Синдаров сўнгги ойларда бутун дунё шахмат жамоатчилигининг диққат марказида турибди. Яқиндагина Номзодлар турнирида тарихий ғалабага эришиб, кўпчиликни ҳайратда қолдирган ёш гроссмейстер ҳозирда Польшада ўтаётган нуфузли Grand Chess Tour мусобақасида дунё юлдузларига қарши баҳс олиб бормоқда.
Синдаровнинг Номзодлар турниридаги иштироки нафақат ўзбекистонлик мухлислар, балки халқаро экспертлар томонидан ҳам юқори баҳоланган эди. Чунки у босим ва юқори рақобат муҳитида ўзини жуда ишончли намоён қилди. Айниқса, унинг совуққонлиги ва ҳал қилувчи палладаги аниқ юришлари кўпчиликнинг эътиборини тортган.
Жавоҳирдан Номзодлар турниридан кейин қандай дам олгани ҳақида сўралганда, у кутилмаган жавоб берди. Унинг айтишича, сўнгги икки ҳафта мобайнида шахматдан деярли бутунлай узоқлашган.
— Номзодлар турнири инсондан жуда катта энергия олади. Руҳан ҳам, жисмонан ҳам қаттиқ чарчайсан. Шунинг учун миямни тўлиқ дам олдиришга қарор қилдим. Шахмат ҳақида ўйламасликка ҳаракат қилдим. Кўпроқ Counter-Strike ўйнадим, бошқа ишлар билан шуғулландим, — деди Синдаров.
Ёш шахматчи Польшадаги мусобақага ҳам жиддий тайёргарликни жуда кеч бошлаганини тан олди.
— Grand Chess Tour бошланишига атиги икки кун қолгандагина қайта тайёргарликка киришдим. Чунки аввал ўзимни тиклаб олиш муҳим эди, — дея қўшимча қилди у.
Шунга қарамай, Жавоҳир мусобақанинг дастлабки баҳсларидаёқ ўзининг юқори даражасини намоён қилишга улгурди. Унинг таъкидлашича, айрим партияларда ғалаба қозониш осон кечмаган.
— Ўйин вақтида баъзи вазиятларда ютиш жуда қийиндек кўринди. Лекин охирида ғалаба қозона олдим. Биринчи кундан умумий маънода кўнглим тўлди, — деди ўзбекистонлик гроссмейстер.
Мутахассислар фикрича, Синдаровнинг қисқа вақт ичида қайта тикланиб, яна юқори даражада ўйнай бошлаши унинг психологик тайёргарлиги ва профессионал ёндашувини кўрсатади. Замонавий шахматда нафақат назария ва ҳисоб-китоб, балки руҳий барқарорлик ҳам катта аҳамиятга эга.
Жавоҳир Синдаровнинг муваффақиятлари ҳозирда ўзбек шахматининг янги авлоди шаклланаётганини кўрсатмоқда. Унинг ўйинлари миллионлаб мухлислар томонидан кузатилмоқда ва кўпчилик уни келажакда жаҳон чемпионлиги учун курашадиган асосий даъвогарлардан бири сифатида кўрмоқда.
“Zamin”ни Telegram'да ўқинг!
