ФИФА президенти Жанни Инфантино 2026 йилги жаҳон чемпионати чипталари нархи атрофидаги танқидларга ўзига хос ҳазиломуз муносабат билдирди. Сўнгги кунларда турнир ўйинлари учун жорий этилган янги VIP тоифадаги чипталар нархи 2300 долларгача етиши мумкинлиги ҳақидаги хабарлар мухлислар орасида катта муҳокамаларга сабаб бўлган эди.
Gianni Infantino Беверли-Ҳиллзда бўлиб ўтган анжуманда бу мавзуда фикр билдириб, ҳазил аралаш шундай деди:
— Агар кимдир финал учун икки миллион долларлик чипта сотиб олса, мен унга шахсан ўзим хот-дог ва кола олиб келаман. Фақат у ўйиндан яхши завқ олсин, — деди ФИФА раҳбари.
Унинг таъкидлашича, ташкилот бозор қоидаларини инобатга олишга мажбур.
— Биз дунёдаги энг ривожланган кўнгилочар бозорлардан бири бўлган мамлакатда ишлаяпмиз. Шунинг учун бозор нархлари билан ҳисоблашишимиз керак. АҚШда чипталарни қайта сотишга ҳам расман рухсат берилган. Агар биз нархларни жуда паст қўйсак, кейин улар иккинчи бозорда янада қимматроқ нархларда сотилади, — деди Инфантино.
ФИФА президентининг айтишича, айрим мухлислар нархлардан норози бўлаётганига қарамай, қайта сотиш платформаларида чипталар қиймати икки бараваргача ошиб кетиши мумкин.
Шу билан бирга, у барча чипталар жуда қиммат эмаслигини ҳам таъкидлади. Маълум қилинишича, гуруҳ босқичи учун ажратилган чипталарнинг қарийб 25 фоизи 300 доллардан камроқ нархда сотувга чиқарилади.
ФИФА маълумотларига кўра, ҳозирнинг ўзидаёқ 2026 йилги жаҳон чемпионати чипталари учун 500 миллиондан ортиқ ариза келиб тушган. Бу аввалги икки мундиал билан солиштирилганда жуда катта кўрсаткич ҳисобланади. Чунки аввалги жаҳон чемпионатларида аризалар сони тахминан 50 миллион атрофида бўлган.
Эслатиб ўтамиз, 2026 йилги футбол бўйича жаҳон чемпионати 11 июндан 19 июлгача АҚШ, Канада ва Мексикада бўлиб ўтади. Бу тарихдаги энг йирик мундиаллардан бири бўлиши кутилмоқда.
“Zamin”ни Telegram'да ўқинг!
