Бавария Чемпионлар лигаси ярим финалида PSJга қарши кечган драматик баҳслардан сўнг турнирни тарк этди. Мюнхенликлар сафарда 4:5 ҳисобида мағлуб бўлганидан сўнг, ўз майдонида 1:1 ҳисобидаги дуранг билан кифояланди. Халқаро ОАВ жамоанинг ўйинини "ачинарли" ва "чарчаган" дея таърифлаб, PSJнинг финалга чиқишини ҳақли деб баҳолади. Бу ҳақда Goal.com хабар беради.
Франциянинг ЛЪEқуипе нашри Мюнхен стадионини PSJ учун омадли маскан деб атади. Ле Фигаро эса парижликларнинг ҳимоядаги қаҳрамонлигини алоҳида таъкидлаб, жамоанинг иккинчи Европа кубоги сари дадил одимлаётганини ёзди. Испаниянинг Марка ва Мундо Депортиво нашрлари эса Луис Энрике шогирдларининг тактик ғалабасига урғу бериб, финалда Микел Артета бошчилигидаги Арсенал билан тўқнашув кутилаётганини қайд этди.
Ўйин давомида мюнхенликлар пеналти борасида эътироз билдиришди. Биринчи бўлимда Витинянинг тўп узатиши жарима майдончаси ичида Жоао Невеснинг қўлига теккан бўлса-да, ҳакамлар қоидага кўра, жамоадоши томонидан тепилган тўп қўлга теккан вазиятда пеналти белгиланмаслигини маълум қилди.
Бавария таркибида Гарри Кейн ўйин сўнгида гол урган бўлса-да, бу жамоани қутқариб қола олмади. Мутахассислар Мюнхен клубининг ўйинида етакчилик етишмаётганини ва жамоа янгиланишга муҳтож эканини таъкидламоқда. Эндиликда PSJ 30-май куни Будапештда бўлиб ўтадиган финалда Арсеналга қарши майдонга тушади.
“Zamin”ни Telegram'да ўқинг!
