Мадриднинг машҳур “Реал” клубида яна шов-шувли ҳолат юзага келди. Жамоанинг энг катта юлдузларидан бири саналган Килиан Мбаппе сўнгги кунларда нафақат ўйини, балки ички можаролари билан ҳам муҳокамалар марказида қолмоқда.
The Athletic нашри тарқатган маълумотларга кўра, француз ҳужумчиси “қаймоқранглилар” мураббийлар штаби аъзоларидан бири билан жиддий тортишувга киришган.
Маълум қилинишича, можаро 24 апрель куни “Бетис”га қарши бўлиб ўтган учрашувдан олдинги машғулот жараёнида содир бўлган. Ўша баҳсда мадридликлар сафарда 1:1 ҳисобида дуранг ўйнаган эди.
Манба хабарига кўра, машғулотдаги ички ўйин пайтида мураббийлар штаби вакили Мбаппега офсайд қайд этган. Бу қарор эса юлдуз футболчининг қаттиқ жаҳлини чиқарган.
Қайд этилишича, Килиан мазкур вазиятга нисбатан жуда кескин муносабат билдириб, ходимга ғазаб билан эътироз қилган ҳамда ҳақоратомуз сўзлар ишлатган. Нашр ушбу ҳолат жамоа ичида ҳам муҳокама қилинганини ёзмоқда.
Мутахассислар фикрича, сўнгги ҳафталарда “Реал” атрофидаги босим, танқидлар ва чемпионлик пойгасидаги мураккаб вазият айрим футболчиларнинг руҳий ҳолатига таъсир қилмоқда. Айниқса, Мбаппе каби жамоанинг асосий юлдузига бўлган талаб ва кутилмалар жуда юқори.
Шунга қарамай, француз ҳужумчисининг статистикаси ҳали ҳам ҳайратланарли даражада қолмоқда. Жорий мавсумда у барча мусобақалар доирасида 41 та учрашувда қатнашиб, 41 та гол урди ва 6 та голли узатма амалга оширди.
Бу рақамлар Мбаппенинг ҳужум чизиғида ҳал қилувчи фигура эканини яна бир бор тасдиқлаб турибди. Шу билан бирга, унинг “Реал” билан тузган шартномаси 2029 йил ёзигача амал қилади.
Transfermarkt портали маълумотига кўра, ҳозирги пайтда Килиан Мбаппенинг бозор қиймати 200 миллион евро атрофида баҳоланмоқда. Бу эса уни жаҳон футболидаги энг қиммат футболчилардан бирига айлантириб турибди.
“Zamin”ни Telegram'да ўқинг!
