«Манчестер Сити» жамоасида ёзги ўзгаришлар олдидан ҳиссиётларга бой кеча ташкил этилди. Жамоанинг тажрибали футболчилари Бернардо Силва ва Жон Стоунз кеча тунда Манчестер шаҳридаги машҳур “Луи” ресторанида махсус хайрлашув зиёфатини уюштирди.
Тадбирга клубнинг деярли барча футболчилари таклиф қилинган бўлиб, улар ўз рафиқалари ва қиз дўстлари билан иштирок этди. Кеча жамоа аъзолари учун ўзига хос норасмий йиғин ва мавсум якунига бағишланган самимий учрашувга айланди.
Манбаларга кўра, тадбирда жамоанинг собиқ аъзолари ҳам кўриниш берган. Хусусан, “шаҳарликлар” тарихида муҳим ўрин тутган Коло Туре ва Кайл Уокер ҳам кечада иштирок этгани мухлислар эътиборини тортди.
Ўзбекистонлик ҳимоячи Абдуқодир Ҳусанов ҳам мазкур тадбир меҳмонлари орасида бўлган. Ёш футболчининг Европадаги катта юлдузлар билан бир даврада қатнашиши ўзбек мухлислари орасида ҳам қизғин муҳокама қилинмоқда.
Кузатувчилар фикрича, бу каби йиғинлар жамоа ичидаги муҳит ва бирдамликни янада мустаҳкамлашга хизмат қилади. Айниқса, узоқ ва оғир мавсумдан кейин футболчилар учун бундай норасмий кечалар руҳий дам олиш имконини беради.
Шу билан бирга, Бернардо Силва ва Жон Стоунзнинг хайрлашув кечаси уюштиргани келажакда айрим футболчилар клубни тарк этиши мумкинлиги ҳақидаги тахминларни ҳам кучайтирди. Айрим инглиз нашрлари бу йиғинни эҳтимолий ўзгаришлар олдидан ташкил этилган махсус кеча сифатида баҳоламоқда.
Ҳозирча “Манчестер Сити” раҳбарияти ёки футболчилар томонидан расмий баёнот берилмаган. Бироқ мухлислар клубда катта трансферлар ва таркибий ўзгаришлар бўлиши мумкинлигини тахмин қилишмоқда.
“Zamin”ни Telegram'да ўқинг!
