Саудия Про-лигасининг 33-турида мухлислар яна бир ёрқин ва голларга бой баҳс гувоҳига айланишди. Пешқадамлардан бири бўлган “Ан Наср” сафарда “Аш Шабоб” меҳмони бўлиб, томошабоп учрашувда 4:2 ҳисобида ғалаба қозонди.
Беллашувнинг ҳақиқий қаҳрамони Жоау Феликс бўлди. Португалиялик ҳужумчи майдонда фантастик ўйин намойиш этиб, хет-трикка эришди ва жамоасининг асосий ғалаба меъморига айланди.
Учрашув жуда тезкор бошланди. Феликс 3-дақиқадаёқ ҳисобни очиб, “Ан Наср”ни олдинга олиб чиқди. Орадан кўп ўтмай, у яна бир бор рақиб дарвозасини ишғол қилиб, ҳисобни 2:0 кўринишига келтирди.
Бироқ мезбонлар таслим бўлишни исташмади. “Аш Шабоб” футболчилари Карраско орқали ҳисобни қисқартиришга муваффақ бўлди ва баҳс яна қизиқ тус олди.
Иккинчи бўлимда эса саҳнага футбол афсонаси Криштиану Роналду чиқди. Португалиялик суперюлдуз 75-дақиқада ўзининг навбатдаги голини уриб, профессионал фаолиятидаги голлари сонини 971 тага етказди.
Бу гол нафақат “Ан Наср” учун муҳим бўлди, балки Роналдунинг футбол тарихидаги феноменал статистикасини янада бойитди.
Кейинчалик “Аш Шабоб” яна бир гол уриб интригани сақлаб қолишга уринди. Аммо ўйинга нуқтани айнан Жоау Феликс қўйди. У қўшимча дақиқаларда ўзининг учинчи голини уриб, хет-трикни расмийлаштирди.
Саудия Пролигаси. 33-тур
Аш Шабоб – Ан Наср 2:4
Голлар: Карраско 30, Ал Булайҳи 80 – Феликс 3, 10, 90+8, Роналду 75
Ан Наср – Бенто, Cултон (Ал Носир, 87), Айман, Амри, Мартинес, Брозович, Ғариб (Бушал, 71), Мане, Ҳайбари, Феликс, Роналду (Ал Ҳамдан, 90+1).
Шу тариқа, “Ан Наср” муҳим уч очкони қўлга киритиб, чемпионлик пойгасидаги етакчилигини янада мустаҳкамлади. Жамоа ҳисобида ҳозир 82 очко мавжуд.
“Аш Шабоб” эса 32 очко билан турнир жадвалининг 13-поғонасида қолмоқда.
Мутахассислар фикрича, мавсумнинг ҳал қилувчи қисмида “Ан Наср” ҳужум чизиғи жуда хавфли кўринмоқда. Айниқса, Роналду ва Феликснинг биргаликдаги ўйини рақиблар учун катта муаммо туғдирмоқда.
Мухлислар эса ҳозир бир саволни муҳокама қилмоқда: Криштиану Роналду фаолияти давомида 1000 та голлик тарихий маррага ета оладими?
“Zamin”ни Telegram'да ўқинг!
