Англия Чемпионшипининг плей-офф босқичи олдидан футбол муҳитини ларзага солган можаро юзага келди. Гап оддий тактик кураш ёки матбуотдаги психологик босим ҳақида эмас, балки рақиб машғулотини яширинча кузатиш ва тасвирга олиш билан боғлиқ жиддий айблов ҳақида кетмоқда.
Яқин шанба куни “Мидлсбро” ўз майдонида Чемпионшип плей-офф ярим финалининг биринчи ўйинида “Саутгемптон”ни қабул қилади. Кейинги сешанба куни эса жамоалар ўртасида жавоб баҳси бўлиб ўтади. Бу икки учрашув нафақат спорт натижаси, балки клублар келажаги учун ҳам улкан аҳамиятга эга.
Чунки Чемпионшип плей-оффида ғолиб чиққан жамоа Англия Премьер-лигасига йўлланма олади. Бу эса клубга тахминан 200 миллион фунт атрофида молиявий даромад келтириши мумкин. Бундай катта маблағ ўртага тикилганда, ҳар бир тактик детал, ҳар бир стандарт вазият ва ҳатто рақибнинг машғулотдаги кичик ҳаракати ҳам қимматли маълумотга айланади. Футболда баъзан бир бурчак зарбаси ҳам миллионларга тенг бўлиб қолади — ҳа, бу ерда романтика кам, бизнес кўп.
The Athletic нашрининг хабар беришича, “Мидлсбро”нинг Роклифф-парк базасида бир эркак жамоа машғулотини яширинча тасвирга олаётгани аниқланган. Дастлабки тахминларга кўра, ушбу шахс “Саутгемптон” мураббийлар штабига алоқадор бўлиши мумкин.
Маълум қилинишича, “Мидлсбро” ходимларидан бири ушбу эркакни пайқаб, у билан юзма-юз келган. Бироқ гумонланувчи воқеа жойидан қочиб кетишга улгурган. Шундан сўнг “Мидлсбро” клуби Футбол Лигасига расмий шикоят йўллаб, “Саутгемптон”ни жосусликда айблаган. Клуб, шунингдек, кузатув камералари ёзувларини тақдим этишга тайёрлигини билдирган.
Ҳозирда ушбу ҳолатни Футбол Лигаси ўрганмоқда. Тергов жараёни якунида воқеа ҳақиқатан ҳам қоидабузарлик сифатида баҳоланса, “Саутгемптон” учун жиддий оқибатлар келиб чиқиши мумкин. Айниқса, плей-офф каби асаблар максимал даражада таранг бўлган паллада бундай можаро жамоа муҳитига ҳам таъсир ўтказиши эҳтимолдан холи эмас.
Бу ҳолат Англия футболи учун мутлақо янги воқеа эмас. 2019 йилда ҳам шунга ўхшаш жанжал содир бўлганди. Ўшанда “Лидс” бош мураббийи Марсело Бьелса ўз ёрдамчисини “Дерби” машғулотларини кузатиш учун юборгани маълум бўлган. Бу иш катта шов-шувга сабаб бўлиб, Футбол Лигаси “Лидс” клубини 200 минг фунт жаримага тортган эди.
Айнан ўша воқеадан кейин клубларга ўйиндан 72 соат олдин рақиб машғулотларини кузатишни тақиқловчи қоида жорий қилинган. Шунинг учун “Мидлсбро” базасида содир бўлган ушбу ҳолат оддий қизиқувчанлик эмас, балки белгиланган қоидаларни бузиш сифатида кўрилиши мумкин.
Энди барча эътибор Футбол Лигаси қарорига қаратилган. Агар айбловлар тасдиқланса, бу плей-офф олдидан “Саутгемптон” учун катта имидж зарбаси бўлади. “Мидлсбро” эса майдондаги курашдан ташқари, адолат масаласида ҳам ўз позициясини ҳимоя қилишга киришган.
Бир нарса аниқ: Премьер-лига йўлланмаси учун кураш ҳар доим қаттиқ кечган, аммо бу сафар интрига майдон ташқарисида ҳам авжига чиқди. Энди мухлислар нафақат ўйин натижасини, балки жосуслик можароси қандай якун топишини ҳам катта қизиқиш билан кузатади.
“Zamin”ни Telegram'да ўқинг!
