“Барселона” афсонаси, ҳозирда “Интер Майами” сафида фаолият юритаётган Лионел Месси ёш авлод футболчилари ҳақида фикр билдириб, Ламин Ямалга алоҳида тўхталди. Аргентиналик юлдузнинг айтишича, ҳозирги ёшлар орасида унинг ёшлик давридаги ўйинига энг кўп ўхшайдиган футболчи айнан “Барселона” вингери ҳисобланади.
Месси Ламин Ямални янги авлоднинг энг иқтидорли ва ёрқин вакилларидан бири сифатида баҳолади. Унинг фикрича, Ямал майдондаги дадиллиги, тўп билан ишлаш маданияти, рақибни алдаб ўтиш қобилияти ва ўйинни ҳис қилиш борасида ўзига хос футболчига айланиб бормоқда.
“Янги авлод ўйинчилари орасида, менимча, Ламин Ямал — менинг ёш пайтдаги версиямга энг кўп ўхшайдиган футболчи. Бунга ҳеч қандай шубҳам йўқ, мен учун Ламин — янги авлод вакилларининг энг яхшиси”, — деди Месси.
Бу эътироф Ямал учун жуда катта мақтов ҳисобланади. Чунки Мессидек футбол тарихида алоҳида ўрин тутган юлдуздан бундай баҳо олиш ҳар қандай ёш футболчи учун катта ишонч ва масъулият юклайди. Айниқса, “Барселона” академиясидан етишиб чиққан футболчи учун Месси билан таққосланиш оддий гап эмас.
Ламин Ямал сўнгги вақтларда “Барселона” ва Испания терма жамоасидаги ўйинлари билан катта эътибор марказида бўлиб келмоқда. У ёш бўлишига қарамай, майдонда катта футболчиларга хос совуққонлик, техника ва тез фикрлаш қобилиятини намойиш этмоқда. Бу жиҳатлар уни нафақат клуб мухлислари, балки бутун футбол жамоатчилиги учун қизиқарли футболчига айлантирди.
Албатта, Месси билан ҳар қандай таққослаш эҳтиёткорликни талаб қилади. Чунки аргентиналик юлдуз футбол тарихидаги энг буюк ўйинчилардан бири саналади. Аммо Мессининг ўзи Ямални алоҳида тилга олгани ёш футболчининг салоҳияти нақадар юқори эканини кўрсатади.
Ҳозирда Ламин Ямал жароҳатдан тикланиш жараёнини давом эттирмоқда. Мухлислар унинг тезроқ майдонга қайтиб, яна аввалгидай ёрқин ўйинлар намойиш этишини кутмоқда. Чунки бундай иқтидорлар футболга алоҳида ранг беради.
Месси аввалроқ 2026 йилги жаҳон чемпионати фаворитлари ҳақида ҳам фикр билдирган эди. Энди эса унинг Ямал ҳақидаги гаплари катта муҳокамага сабаб бўлиши аниқ. Сабаби, футболда “янги Месси” деган таъриф кўп ишлатилади, лекин бу сафар бу ўхшатишни Мессининг ўзи айтди. Бу эса гапнинг вазнини анча оширади.
“Zamin”ни Telegram'да ўқинг!
