Лондоннинг Арсенал клуби PSJ ҳужумчиси Брадлей Барколани ўз сафига қўшиб олиш учун жиддий даъвогарга айланди. Микел Артета янги мавсум олдидан ҳужум чизиғини кучайтиришни мақсад қилган ва франциялик футболчини асосий нишонлардан бири сифатида кўрмоқда. Бу ҳақда Goal.com хабар беради.
Скй Германй хабарига кўра, Арсенал вакиллари аллақачон футболчининг агентлари билан дастлабки музокараларни бошлаб юборган. Баркола ўзининг тезкорлиги ва бирга-бир вазиятлардаги маҳорати билан Артета тизимига мос келиши кутилмоқда. Ҳозирча расмий таклиф юборилмаган бўлса-да, томонлар ўртасидаги мулоқотлар давом этмоқда.
Ушбу трансфер пойгасида Барселона ва Ливерпул клублари ҳам фаоллик кўрсатмоқда. Каталонияликлар узоқ вақтдан бери футболчининг ўйинларини кузатиб келаётган бўлса, Ливерпул ҳам таркибни янгилаш мақсадида Баркола номзодини кўриб чиқмоқда.
22 ёшли футболчи 2023-йилда Лиондан PSJга ўтганидан буён ўз ўйинини сезиларли даражада кучайтирди. У Луис Энрике қўл остида муҳим ўйинчига айланган бўлса-да, Европанинг топ клублари қизиқиши ёзги трансфер ойнасида катта рақобатни келтириб чиқариши мумкин.
Барколанинг Париж клуби билан амалдаги шартномаси 2028-йилга қадар мўлжалланган. Шу сабабли PSJ уни сотишга шошилмаяпти, бироқ футболчининг ўзи фаолиятини бошқа чемпионатда давом эттириш имкониятларини кўриб чиқмоқда.
“Zamin”ни Telegram'да ўқинг!
