Интер Тоттенхем дарвозабони трансферидан воз кечиши мумкин

Италия матбуотида тарқалган хабарларга кўра, Интер клуби Тоттенхем дарвозабони Гуглиелмо Викарио трансфери борасидаги режаларини қайта кўриб чиқмоқда. Гарчи томонлар шахсий шартлар бўйича келишувга эришган бўлса-да, А Серия чемпиони ушбу битимдан бутунлай воз кечиш эҳтимолини ўрганмоқда. Бу ҳақда Goal.com хабар беради.

Дастлаб, Гуглиелмо Викарио Сан-Сирода янги даврни бошлаб берадиган асосий дарвозабон сифатида кўрилаётган эди. Тоттенхем футболчи учун тахминан 20 миллион евро талаб қилаётган бўлса-да, Интер раҳбарияти маблағларни таркибнинг бошқа чизиқларини кучайтиришга йўналтиришни маъқул кўрмоқда.

Корриере делло Спорт нашрининг ёзишича, Интер ушбу қарорга келишига Хосеп Мартинезнинг ўйинлари сабаб бўлмоқда. Клуб Янн Соммер кетганидан сўнг, айнан Мартинезни асосий дарвозабон сифатида кўрмоқчи.

27 ёшли Хосеп Мартинез 2024-йилги ёзги трансфер ойнасида Геноадан келиб қўшилган эди. Интер раҳбарияти катта маблағ сарфлаб янги дарвозабон олгандан кўра, мавжуд имкониятлардан фойдаланган ҳолда таркибни мувозанатлашни мақсад қилган.

Nodirbek Razzokov

«ZAMIN.UZ» муҳаррири

+ Zamin.uz сайтини Googleга қўшинг