Мадриднинг “Реал” клуби янги мавсум олдидан жамоа ичидаги муҳитни тубдан яхшилашни энг муҳим вазифалардан бири сифатида белгиламоқда. AS нашрининг хабар беришича, клуб раҳбарияти янги бош мураббий олдига аввало жорий мавсумда йўқотилган барқарорлик, ҳурмат ва ички тартибни тезроқ тиклаш талабини қўймоқчи.
Манбага кўра, “қаймоқранглилар”ни янги мавсумда ким бошқаришидан қатъи назар, ундан биринчи навбатда кийиниш хонасидаги вазиятни назоратга олиш, футболчилар ўртасидаги муносабатларни барқарорлаштириш ва клуб ичидаги интизомни қайта тиклаш талаб қилинади. Чунки сўнгги вақтларда “Реал” атрофида фақат майдондаги натижалар эмас, балки жамоа ичидаги келишмовчиликлар ҳам кўп муҳокама қилинмоқда.
Айни пайтда “Бенфика”да фаолият юритаётган Жозе Моуриньо “Реал” бош мураббийлигига энг яқин номзодлардан бири сифатида тилга олинмоқда. Португалиялик мутахассис мадридликлар таклифини қабул қилишга ва мураккаб вазиятни ижобий томонга ўзгартиришга тайёр экани айтилмоқда.
Моуриньо “Реал” муҳитини яхши биладиган мураббийлардан бири. Унинг характери, қаттиққўллиги ва кийиниш хонасидаги тартибга алоҳида эътибор қаратиши мадридликлар учун айнан ҳозир керак бўлиши мумкин. “Реал”да баъзан чиройли тактикадан аввал жимлик, интизом ва ҳурматни қайтариш керак бўлади. Футбол тилида айтганда, аввал кийиниш хонасини ютиш керак, кейин майдонни.
Клуб раҳбарияти учун иккинчи устувор вазифа таркибни кучайтириш ҳисобланади. Ёзги трансфер ойнасида жамоага янги футболчилар таклиф қилиниши мумкин. Бироқ раҳбарият ички муаммолар ҳал қилинмас экан, янги ўйинчиларнинг келиши ҳам барча саволларга жавоб бўла олмаслигини тушуниб турибди.
Айниқса, футболчилар ўртасидаги келишмовчиликлар, кийиниш хонасидаги гап-сўзларнинг оммавий ахборот воситаларига чиқиб кетиши ва жамоа ичидаги ишонч муҳитининг заифлашиши “Реал” учун жиддий хавф сифатида кўрилмоқда. Бундай ҳолатлар клуб имижига ҳам, майдондаги натижаларга ҳам салбий таъсир қилиши мумкин.
“Реал Мадрид” каби клубда ички тартиб фақат маъмурий масала эмас. Бу ғалаба маданиятининг бир қисми. Футболчилар қанчалик истеъдодли бўлмасин, агар жамоа ичида бирдамлик ва ўзаро ҳурмат бўлмаса, катта мақсадларга етиш қийинлашади.
Шу боис янги мураббийдан катта иш кутилади. У нафақат тактик режа тузиши, балки жамоа руҳини қайта тиклаши, футболчиларни ягона мақсад атрофида бирлаштириши ва клуб атрофидаги ортиқча шовқинни камайтириши керак бўлади.
Ҳозирча “Реал” янги мураббий масаласида якуний қарор қабул қилгани йўқ. Аммо бир нарса аниқ: клуб раҳбарияти навбатдаги мавсумни аввалгидек ички муаммолар билан бошлашни истамайди. Мадридда энди фақат янги футболчилар эмас, янги тартиб ҳам керак.
“Zamin”ни Telegram'да ўқинг!
