“Барселона” Испания футболи тарихидаги энг катта рақобатлардан бири — “Эл-класико”лардаги ғалабалар сони бўйича “Реал Мадрид”га етиб олди. Ҳанси Флик бошчилигидаги каталонияликлар Ла Лиганинг 35-турида мадридликларни 2:0 ҳисобида мағлуб этиб, тарихий натижага эришди.
Ушбу ғалаба “Барселона” учун оддий уч очко эмас, балки рақобат тарихида муҳим бурилиш бўлди. Чунки бу натижадан сўнг “кўк-анорранглилар” расмий “Эл-класико”лардаги ғалабалар сонини 106 тага етказди. “Реал Мадрид” ҳисобида ҳам айнан 106 та ғалаба бор. Демак, икки буюк клуб ўртасидаги тарихий курашда мувозанат тикланди.
“Эл-класико” ҳар доим фақат футбол ўйини бўлиб қолмаган. Бу баҳсда обрў, ғурур, анъана, мухлислар кайфияти ва клублар тарихидаги катта даъво ўртага қўйилади. Шу сабаб “Барселона”нинг ғалабалар сони бўйича “Реал”га етиб олгани каталониялик мухлислар учун алоҳида қувончли воқеа бўлди.
Жамоалар ўртасидаги ўзаро баҳсларда 52 марта дуранг натижа қайд этилган. Бу рақам ҳам рақобат қанчалик тенг ва муросасиз кечиб келаётганини кўрсатади. Ҳар икки клуб турли даврларда устунлик қилган, юлдузлар алмашган, мураббийлар ўзгарган, аммо “Эл-класико”нинг қиймати ҳеч қачон пасаймаган.
Урилган голлар бўйича эса “Реал Мадрид” ҳали ҳам кичик устунликка эга. Мадридликлар “Барселона” дарвозасига 444 та гол урган бўлса, каталонияликлар “Реал” дарвозасини 441 марта ишғол қилган. Фарқ атиги 3 та голни ташкил этмоқда. Яъни бу рақобатда ҳатто статистика ҳам асабни ушлаб туролмайди.
Ла Лиганинг жорий мавсумида “Барселона” муддатидан аввал чемпионликни қўлга киритди. “Реал” устидан қозонилган 2:0 ҳисобидаги ғалаба эса бу чемпионликни янада ширин қилди. Чунки азалий рақибни мағлуб этиб, тарихий тенгликка эришиш ва мавсумни чемпион сифатида якунлаш — мухлислар учун деярли идеал сценарий.
Ҳанси Флик жамоаси ушбу мавсумда нафақат натижа, балки характер ҳам кўрсатди. “Эл-класико”даги ғалаба каталонияликларнинг руҳий устунлигини янада оширди ва клуб тарихида яна бир ёрқин саҳифа очди.
Қисқаси, “Барселона” бу сафар бир ўйинда икки ишни уддалади: “Реал”ни мағлуб этди ва “Эл-класико” тарихида ғалабалар бўйича тенглашиб олди. Энди рақобат яна нолдан бошлангандек — кейинги “Эл-класико”да ким олдинга чиқиши эса алоҳида интрига.
“Zamin”ни Telegram'да ўқинг!
