Реал Мадрид президенти Флорентино Перез Испания ҳакамлар корпусига қарши айтган кескин сўзлари туфайли жиддий жазо хавфи остида қолди. У ҳакамларнинг ишини "ўғрилик ва коррупция" деб атагани учун Испания Қироллик футбол федерацияси (РФEФ) интизом қўмитасига шикоят қилинди. Бу ҳақда Goal.com хабар беради.
АESAФ ҳакамлар уюшмаси Перезнинг ўтган сешанба куни ўтказилган матбуот анжуманидаги чиқишини қоралаб, бу сўзлар сўз эркинлиги доирасидан чиқиб кетганини таъкидлади. Уюшма фикрича, клуб раҳбари ҳакамларнинг хатоларини кўрсатиш билан чекланмай, уларни йигирма йил давомида тизимли коррупцияда айблаган.
Мундо Депортиво нашрининг хабар беришича, РФEФ интизом кодексининг 94-моддасига кўра, Флорентино Перез бир ойдан икки йилгача бўлган муддатга футбол фаолиятидан четлатилиши мумкин. Бироқ, экспертлар 106-моддага асосан жарима жазоси тайинланиши эҳтимоли юқорироқ эканини айтишмоқда.
Мазкур модда ҳакамларнинг ҳалоллиги ва холислигига шубҳа билдирувчи баёнотлар учун жавобгарликни назарда тутади. Агар айби тасдиқланса, клуб раҳбари 601 евродан 3005 еврогача миқдорда жаримага тортилиши кутилмоқда.
“Zamin”ни Telegram'да ўқинг!
