Реал Мадриддаги муваффақиятсиз мавсумдан сўнг, Хаби Алонсо фаолиятини Челси клубида давом эттирадиган бўлди. Кўпчилик мутахассислар испаниялик мураббийнинг бу қарорини таваккалчилик деб атамоқда, бироқ клуб раҳбарияти билан эришилган келишувда муҳим фарқ бор. Челси расман Алонсо билан 2030-йилгача мўлжалланган тўрт йиллик шартнома имзолаганини эълон қилди. Бу ҳақда Goal.com хабар беради.
Олдинги мураббийлар Энзо Мареска ва Лиам Росениор «бош мураббий» сифатида таништирилган бўлса, Алонсо айнан «менежер» мақомида иш бошлайди. Бу кичик фарқдек туюлиши мумкин, аммо у мураббийга таркибни шакллантириш ва трансфер сиёсатида кенгроқ ваколатлар беради. БлуеКо консорциуми бу сафар узоқ муддатли лойиҳага тайёрлигини кўрсатмоқда.
Эслатиб ўтамиз, Мареска Чемпионлар лигаси йўлланмасини қўлга киритганига қарамай, 2025/26-йилги мавсум ўрталарида истеъфога чиқарилганди. Унинг ўрнига келган Лиам Росениор эса атиги уч ярим ой ишлай олди. Жамоа ичидаги келишмовчиликлар ва юлдуз футболчилар билан тил топиша олмагани унинг тезда ишдан кетишига сабаб бўлди.
Хаби Алонсо учун ҳам асосий синов айнан кийиниш хонасидаги муҳитни назорат қилиш бўлади. Реал Мадридда Винисиус Жуниор ва Жуд Беллингем каби юлдузлар билан юзага келган тушунмовчиликлар унинг обрўсига путур етказган эди. Эндиликда Алонсо Челси таркибини бирлаштириб, жамоани янги чўққиларга олиб чиқишга уриниб кўради.
“Zamin”ни Telegram'да ўқинг!
