Бразилия миллий жамоаси юлдузи Неймар 2026 йилги Жаҳон чемпионати учун якуний таркибга киритилганидан кейин ўз ҳиссиётлари ҳақида очиқ гапирди. “Сантос”нинг 34 ёшли ҳужумчиси узоқ танаффусдан сўнг яна терма жамоа либосида катта мусобақага бориш имкониятига эга бўлди.
Неймар 2023 йилдан буён жароҳатлар ва спорт формасидаги муаммолар сабаб Бразилия миллий жамоаси сафида майдонга тушмаган эди. Шу боис унинг мундиал қайдномасига киритилиши футболчи учун жуда ҳиссий воқеага айланди.
“Бир неча соат йиғладим, бу натижага эришиш осон бўлмади. Исмим эълон қилинганидан кейин бошимдан кечирган барча қийинчиликлар ва қилган меҳнатларим арзирлик бўлганини англадим”, — деди Неймар Santos TV эфирида.
Футболчининг таъкидлашича, миллий жамоага қайтиш у учун ҳар доим алоҳида туйғу бағишлайди. Неймар Бразилия термасини ўз уйидек ҳис қилишини ва бу ҳолатни сўз билан тушунтириш қийинлигини айтди.
“Доим айтганимдек, миллий жамоага қайтганимда ўзимни уйдагидек ҳис қиламан. Буни тушунтириш қийин”, — дея қўшимча қилди у.
Неймар шунингдек, ушбу жараёнда унга ёрдам берган барча инсонларга миннатдорчилик билдирди. Унинг айтишича, бу чақирув фақат шахсий ютуқ эмас, балки унинг соғлиғи, хавфсизлиги, тикланиши ва тайёргарлиги учун меҳнат қилган бутун жамоанинг ҳам натижасидир.
Қисқаси, Неймар учун бу чақирув оддий рўйхатга кириш эмас, катта қайтиш рамзи бўлди. Жароҳатлар, шубҳалар ва оғир кунлар ортда қолди. Энди эса у Бразилия билан яна катта саҳнага чиқишга тайёрланмоқда. Орзу тирик, Неймар эса ҳали охирги сўзини айтмаган.
“Zamin”ни Telegram'да ўқинг!
