Тоттенхем сардори Кристиан Ромеро Англия Премер-лигасининг сўнгги турида жамоасини қўллаб-қувватлаш ўрнига Аргентинага учиб кетгани учун кескин танқидлар остида қолди. Лондонликлар лигада жон сақлаб қолиш учун Эвертон жамоасига қарши ҳал қилувчи баҳсга тайёргарлик кўраётган бир пайтда, жароҳатланган ҳимоячи ўз ватанига йўл олди. Бу ҳақда Goal.com хабар беради.
Марказий ҳимоячи ўтган ойда Сандерлендга қарши ўйинда тиззасидан жароҳат олиб, сафдан чиққан эди. Гарчи у майдонга туша олмаса-да, жамоа сардори сифатида бундай оғир дамда клуб билан бирга бўлмаслиги мухлислар ва экспертларнинг эътирозига сабаб бўлди. Кристиан Ромеро якшанба куни ўзи вояга етган Белграно клубининг Ривер Плате жамоасига қарши тарихий чемпионлик баҳсини бевосита стадиондан кузатишни афзал кўрган.
Ушбу ҳолатга талкСПОРТ бошловчиси ва Тоттенхем мухлиси Паул Ҳавксбее кескин муносабат билдирди. Унинг фикрича, сардорнинг бу қарори унинг клубга бўлган садоқатини шубҳа остига қўяди. Ҳавксбее футболчининг устуворликлари Премер-лигада қолиш учун курашаётган жамоасидан кўра узоқроқда эканини таъкидлаб, буни "даҳшатли қарор" деб атади.
Жанубий америкалик футбол эксперти Тим Виккерй эса вазиятга ойдинлик киритишга ҳаракат қилди. Унинг сўзларига кўра, Белграно Кристиан Ромеро учун шунчаки клуб эмас, балки у ўз фаолиятини бошлаган қадрдон жамоасидир. Белграно ўз тарихида ҳали ҳеч қачон Аргентина чемпионлигини қўлга киритмаган, шу сабабли Ривер Плате билан бўладиган ўйин футболчи учун жуда муҳим аҳамиятга эга.
Тоттенхем учун эса вазият анча жиддий, чунки жамоа Англия футболининг иккинчи дивизионига тушиб кетиш хавфи остида турибди. Сардорнинг йўқлиги жамоа ичидаги муҳитга қандай таъсир қилиши ҳозирча номаълум, бироқ мухлислар ижтимоий тармоқларда жаҳон чемпиони бўлган ҳимоячининг бу ҳаракатидан норози эканликларини билдиришмоқда.
“Zamin”ни Telegram'да ўқинг!
