Саудия Арабистони чемпионатининг сўнгги турида “Ан Наср” ўз майдонида лигада қолиш учун курашаётган “Дамак”ни қабул қилди ва 4:1 ҳисобида ишончли ғалабага эришди. Ушбу натижа Риёд клубига мавсумни чемпион сифатида якунлаш имконини берди.
“Ан Наср” 86 очко жамғарган ҳолда Саудия Пролигаси ғолибига айланди. Шу тариқа, жамоа ўз тарихида 10-бор мамлакатнинг энг кучли клуби мақомига эга чиқди. Қайд этиш керак, риёдликлар сўнгги марта 2019 йилда Саудия чемпионлигини қўлга киритган эди. Орадан бир неча йил ўтиб, клуб яна чемпионлик тахтига қайтди.
Ҳал қилувчи баҳсда “Ан Наср” етакчилари ўз сўзини айтди. Садио Мане 34-дақиқада ҳисобни очди. Иккинчи бўлимда Кингсли Коман жамоасининг устунлигини мустаҳкамлади. “Дамак” 58-дақиқада пенальтидан Силла голи орқали ҳисобни қисқартирди, аммо бу фақат қисқа умид бўлиб қолди.
Шундан кейин саҳнага Криштиану Роналду чиқди. Португалиялик юлдуз 63 ва 81-дақиқаларда рақиб дарвозасини ишғол қилиб, дубль қайд этди. Бу голлар орқали у фаолияти давомидаги умумий голлари сонини 973 тага етказиб олди. Роналду яна бир бор катта ўйинларда босимни кўтаришни ва керакли паллада натижа беришни билишини кўрсатди.
Криштиану учун бу “Ан Наср” сафидаги иккинчи соврин бўлди. У 2023 йилда жамоа билан Араб Чемпионлар Лигасида ҳам ғолиб чиққан эди. Энди эса Саудия чемпионлиги ҳам унинг Риёддаги саҳифасига ёзилди. Ёши ҳақида қанча гап бўлмасин, Роналду ҳали ҳам гол, характер ва чемпионлик кайфияти билан жавоб бермоқда.
Бу мавсумда португалиялик ҳужумчи Саудия лигасида 28 та гол урди ва тўпурарлар пойгасида учинчи ўринни эгаллади. Энг яхши тўпурар номи эса “Ал Қодисия” форварди Куинонесга насиб этди. У мавсум давомида 33 та гол киритиб, чемпионатнинг энг самарали ҳужумчисига айланди.
Якуний жадвалда “Ал Ҳилол” 84 очко билан иккинчи ўринни эгаллади. Элит ОЧЛ ғолиби “Ал Аҳли” 81 очко билан учинчи, “Ал Қодисия” эса 77 очко билан тўртинчи поғонадан жой олди. Дастлабки тўртликка кирган ушбу жамоалар Элит ОЧЛда иштирок этиш ҳуқуқини қўлга киритди.
“Ал Иттиҳод” 55 очко билан бешинчи ўринни банд этди ва ОЧЛ саралаш босқичида қатнашади. 53 очко тўплаган “Ат Таъавун” эса олтинчи поғона орқали ОЧЛ-2 мусобақасида ўйнаш имкониятига эга бўлди.
Мавсум якунида юқори дивизион билан хайрлашган жамоалар ҳам маълум бўлди. “Дамак”, “Ал Аҳдуд” ва “Ан Нажма” Саудия Пролигасини тарк этди. Айниқса, “Дамак” учун сўнгги турдаги мағлубият оғриқли бўлди: жамоа чемпионга қарши курашди, аммо лигада қолиш вазифасини бажара олмади.
34-турнинг яна бир муҳим баҳсида “Ал Файҳа” ўз майдонида “Ал Ҳилол”га 0:1 ҳисобида ютқазди. Учрашувда ягона голни 4-дақиқада Мадаш киритди. “Ал Қодисия” эса “Ал Иттиҳод”га қарши ўйинда 1:5 ҳисобида мағлуб бўлди. Бу баҳсда Куинонес хет-трик қайд этиб, тўпурарлар пойгасидаги устунлигини янада мустаҳкамлади.
Қисқаси, Саудия чемпионати драматик ва ёрқин финал билан якунланди. “Ан Наср” 10-чемпионлигини қўлга киритди, Роналду дубль билан мавсумга нуқта қўйди ва клубнинг 2019 йилдан бери кутилган орзусини амалга оширди. Бу чемпионлик Риёд клуби учун шунчаки соврин эмас, балки янги даврнинг жиддий сигнали бўлди. Энди савол битта: Роналду 1000 гол сари юришни чемпион сифатида давом эттиради.
“Zamin”ни Telegram'да ўқинг!
