Арсенал ярим ҳимоячиси Микел Мерино ўз фаолиятини хавф остида қолдирган ноёб жароҳат ва беш ойлик танаффуснинг психологик қийинчиликлари ҳақида очиқ гапирди. Испаниялик футболчи оёғидаги кам учрайдиган синиш туфайли жарроҳлик амалиётини ўтаб, жамоавий машғулотларга қайтганидан сўнг, жамоадошларининг қўллаб-қувватлаши учун миннатдорчилик билдирди. Бу ҳақда Goal.com хабар беради.
29 ёшли маҳоратли футболчи январ ойида Манчестер Юнайтедга қарши кечган баҳсдан сўнг сафдан чиққан эди. Ўша ўйинда у захирадан майдонга тушиб гол урган, бироқ кутилмаганда оёғидан оғир жароҳат олган эди. Мураккаб синиш дарҳол жарроҳлик амалиётини ва узоқ давом этадиган реабилитация жараёнини талаб қилди, бу эса унинг 21 ўйинда 4 та гол ва 3 та ассист қайд этган муваффақиятли мавсумини тўхтатиб қўйди.
Мерино мутахассислар ҳам илгари дуч келмаган ушбу жароҳатдан қаттиқ қўрққанини тан олди. "Бу оёғимнинг жуда ғалати қисмидаги синиш эди, ҳатто мутахассислар ҳам буни аввал кўришмаган. Бошида жуда қўрқиб кетдим, чунки бошқа футболчиларда бундай ҳолат кузатилмаган эди. Қандай тикланишни ва яна футбол ўйнай олишимни билмасдик", — деди футболчи клуб расмий каналига берган интервюсида.
Жароҳат сабабли Жаҳон чемпионатини ва мавсумнинг ҳал қилувчи қисмини ўтказиб юборишини билган Мерино тушкунликка тушганини яширмади. "Менда иккита йўл бор эди: тушкунликка тушиб йиғлаш ёки бошимни тик тутиб, ижобий кайфиятда ишлашда давом этиш. Мен иккинчи йўлни танладим ва ҳаётга шундай ёндашишга қарор қилдим", — дея қўшимча қилди у.
Машғулотларга қайтган куни ўзини худди мактабга биринчи марта бораётган боладек ҳис қилганини айтган Мерино, Арсенал жамоасидаги муҳитдан мамнунлигини билдирди. Унинг сўзларига кўра, жамоадошларининг меҳри ва клуб раҳбариятининг ишончи унинг тезроқ сафга қайтишига катта ёрдам берган.
“Zamin”ни Telegram'да ўқинг!
