Германия кубоги финалида Бавария жамоасининг 3:0 ҳисобидаги ғалабасидан сўнг, Мюнхен клуби фахрий президенти Ули Ҳоэнесс мухлисларнинг хатти-ҳаракатларидан ғазабга келди. Ўйин давомида ҳар икки жамоа ишқибозлари Германия футбол иттифоқига (ДФБ) қарши биргаликда норозилик намойишларини ўтказишди. Ҳоэнесс Sky нашрига берган интервюсида: “Бугун ҳар икки томон мухлислари қилган иш — бу шунчаки шармандалик. Улар ўйинни бутунлай бузишди”, — дея таъкидлади. Бу ҳақда Goal.com хабар беради.
Учрашувнинг иккинчи бўлими бошида Берлин Олимпия стадионида ДФБ логотипи чизилган ва устидан чизиқ тортилган улкан баннер бир трибунадан иккинчисига ўтказилди. Мухлислар “Рақиблар бирлашди: ДФБ, йўқол!” мазмунидаги баннерларни кўтариб, ташкилотга қарши ҳайқириқлар билан стадионни тўлдиришди. Норозиликнинг асосий сабаби сифатида Германия кубоги финали учун чипта нархларининг ҳаддан ташқари қимматлиги (45 евродан 195 еврогача) кўрсатилган.
Норозилик намойишлари давомида ишқибозлар кўплаб пиротехника воситаларини ёқишди, натижада майдонни қуюқ тутун қоплади. Ҳакам Свен Жаблонски ўйинни бир муддат тўхтатишга мажбур бўлди. “Иккинчи бўлимда шундай лаҳзалар бўлдики, мен ҳеч нарсани кўра олмадим. Агар мухлислар байрам қилишни шундай тасаввур қилишса, мен бунга қаршиман”, — деди Ҳоэнесс.
Бавария фахрий президенти клублар, ДФБ ва сиёсатчиларни бундай “беадаблик”ка қарши кескин чоралар кўришга чақирди. Майдондаги воқеаларга тўхталсак, мюнхенликлар 55-дақиқада Гарри Кейн томонидан урилган гол эвазига ҳисобни очишди. Биринчи бўлимда Штутгарт жиддий қаршилик кўрсатган бўлса-да, танаффусдан сўнг чемпионлар ўйин тизгинини ўз қўлларига олишди ва ишончли ғалабани қўлга киритишди.
“Zamin”ни Telegram'да ўқинг!
