Манчестер Юнайтед ва Англия терма жамоаси афсонаси Уэйн Руни Арсенал жамоасининг тарихий ғалабасидан сўнг, Виктор Гёкересни Англия Премер-лигасида мавсумнинг энг яхши трансфери деб эълон қилди. Собиқ ҳужумчининг фикрича, швециялик футболчи Микел Артета жамоасига чемпионлик пойгасида ҳал қилувчи устунликни тақдим эта олди. Бу ҳақда Goal.com хабар беради.
Арсенал якшанба куни Манчестер Сити жамоасидан етти очко ўзиб кетган ҳолда, йигирма йиллик танаффусдан сўнг ниҳоят Англия Премер-лигаси кубогини боши узра баланд кўтарди. Артета ёзги трансфер ойнасида Мартин Зубименди ва Эберечи Эзе каби иқтидорлар учун 250 миллион фунтдан ортиқ маблағ сарфлаган бўлса-да, Руни айнан Гёкерес барчадан устун турганини таъкидлади.
Эмирейтсдаги катта ўзгаришлар доирасида келган 27 ёшли ҳужумчи Лондон шимолидаги фаолиятини қийин бошлаганига қарамай, чемпион жамоанинг асосий қуролига айланди. Ҳужумчи барча мусобақаларда 21 та гол уриб, ички чемпионатдаги ғалаба ва клубнинг Чемпионлар лигаси финалига қадар босиб ўтган йўлида муҳим рол ўйнади.
2025-26-йилги мавсум якунлари бўйича BBC подкастида сўзга чиққан Руни, дивизионда энг катта таъсир ўтказган футболчини аниқлашда иккиланмади. Манчестер Юнайтед иконаси швециялик футболчининг "канонирлар" муваффақиятига қўшган ҳиссасини юқори баҳолади: "Менимча, бу — Виктор Гёкерес. У Арсеналга айнан етишмаётган нарсани бера олди ва бу чемпионликда асосий омил бўлди".
Шунингдек, Руни Артетанинг тактик ёндашувидаги ўзгаришларни ҳам қайд этди. Кетма-кет уч марта иккинчи ўринни эгаллаганидан сўнг, Арсенал устози ўз устози Пеп Гуардиола услубидан воз кечиб, жисмоний жиҳатдан бақувват ва ҳимояда мустаҳкам жамоа тузишга эътибор қаратди. Рунининг қўшимча қилишича, айнан шу ўзгариш жамоани ҳақиқий чемпионга айлантирди.
“Zamin”ни Telegram'да ўқинг!
