Ал-Насср клубидаги Роналдо сулоласи ўзининг янги қаҳрамонларини кашф этишда давом этмоқда. Криштиано Роналдўнинг кичик ўғли Матео узоқ масофадан жарима зарбасини қойилмақом тарзда амалга ошириб, ижтимоий тармоқларда вирусга айланди. Мазкур гол видеосини Георгина Родригуез ўзининг Instagram саҳифасида улашди. Бу ҳақда Goal.com хабар беради.
Видеода Матео Роналдо Ал-Насср Футуре Талентс академияси сафида тўп сураётгани ва жарима зарбасини худди отасига хос услубда ижро этгани акс этган. Беш карра "Олтин тўп" соҳибининг техникасини эслатувчи кучли зарба тўғридан-тўғри дарвоза тўридан жой олди. Георгина ушбу видеога "Худди отанг Криштиано каби" дея изоҳ қолдириб, ўғлининг муваффақиятидан фахрланишини билдирди.
Бу Матеонинг ижтимоий тармоқларда биринчи бор диққат марказига тушиши эмас. Аввалроқ у ёпиқ майдондаги машғулотлар пайтида голини отасининг машҳур "Сиу" услубида нишонлаб, кўпчиликнинг меҳрини қозонган эди. Кўриниб турибдики, Роналдонинг футбол генлари кейинги авлодга ҳам муваффақиятли ўтмоқда.
Роналдо оиласининг ютуқлари фақат Матео билан чекланиб қолмайди. Катта ўғли Криштиано Жуниор аллақачон Ал-Насср У-13 жамоаси билан Саудия Арабистони ёшлар чемпионлигини қўлга киритишга улгурди. Катта Криштиано Роналдо яқинда асосий жамоа билан Саудия Pro-лигасида ғолиб чиққан бўлса, унинг фарзандлари ҳам ёшликданоқ совринлар коллекциясини бойитмоқда.
“Zamin”ни Telegram'да ўқинг!
