Португалия терма жамоаси юлдузи Криштиано Роналдо 45 ёшида ҳам юқори савияда тўп суриб, 2030-йилги Жаҳон чемпионатида иштирок этиши мумкин. Унинг собиқ жамоадоши Эрик Джемба-Джемба ҳужумчининг фаолиятини айнан ўз ватанида ўтадиган турнирда, ўғли билан бирга якунлаши „мукаммал якун“ бўлишини таъкидлади. Бу ҳақда Goal.com хабар беради.
Ҳозирда Ал-Насср сафида тўп сураётган 41 ёшли ҳужумчи жорий мавсумда 37 ўйинда 30 та гол уриб, ёшига доир барча шубҳаларни йўққа чиқармоқда. Манчестер Юнайтед клубидаги собиқ шериги Джемба-Джембанинг фикрича, Роналдонинг руҳий тайёргарлиги ва меҳнатсеварлиги уни 45 ёшгача ўйнашига имкон беради.
„Мен Криштиано Роналдо 44 ёки 45 ёшгача ўйнай олишига чин дилдан ишонаман. Унинг қилаётган ишлари мени ҳайрон қолдирмайди, чунки уни 17 ёшидан бери танийман. У ҳар доим машғулотлардан кейин ҳам кўпроқ ишлашни хоҳларди. У ўзини такомиллаштиришга руҳан муккасидан кетган“, — дейди собиқ ярим ҳимоячи.
2030-йилги мундиал Португалияда ўтиши Роналдонинг мотивациясини янада ошириши тайин. Энг қизиқарли жиҳати шундаки, ўша вақтда унинг ўғли Криштиано Жуниор 21 ёшда бўлади. Ҳозирда Ал-Насср академиясида порлаётган кичик Роналдо отаси билан бир терма жамоада майдонга тушиши футбол тарихидаги энг гўзал воқеалардан бирига айланиши мумкин.
Джемба-Джемба бу ҳақда шундай деди: „Бу унинг фаолияти учун ажойиб якун ва Португалия футболи учун унутилмас лаҳза бўларди. Тасаввур қилинг, агар Криштиано Жуниор ҳам ўша ерда бўлса, бу шунчаки ақл бовар қилмас воқеа бўлади. Ўғли учун отасининг даражасига чиқиш қийин, чунки Роналдо бошқа сайёралик, лекин бу барибир гўзал ҳикоя бўлар эди“.
“Zamin”ни Telegram'да ўқинг!
