Челси ҳужумчиси Жоау Педро ўзининг жамоадоши Коул Палмер ҳақида кутилмаган баёнот бериб, англиялик плеймейкер Бразилия терма жамоасида Неймар меросхўри бўлиш учун энг муносиб номзод эканлигини таъкидлади. Ҳар икки футболчи ҳам 2026-йилги Жаҳон чемпионати учун қайдномадан ташқарида қолганидан сўнг, ёзги танаффусни халқаро майдондан узоқда ўтказадиган бўлди. Бу ҳақда Goal.com хабар беради.
Рио Фердинанд Пресентс подкастига берган интервюсида Педро дастлаб Палмернинг иқтидорига шубҳа билан қараганини, бироқ Стамфорд Бридгедаги машғулотларда унинг маҳоратига шахсан гувоҳ бўлганини тан олди. Бразилиялик форварднинг фикрича, Палмер беш карра жаҳон чемпионлари ўйинини бошқариш учун зарур бўлган "сеҳрли" қобилиятга эга.
"У жуда ақлли ва сеҳрли футболчи. Мен унга: 'Сени бунчалик кучли деб ўйламагандим', дедим. У менга ҳайрон бўлиб қаради. Ҳозир у билан бирга ўйнаётганим учун унинг даражаси бошқача эканини тушундим. Унга: 'Нега Бразилияга келмайсан? У ерда 10-рақам сеники бўлади', дедим. Чунки Бразилияда ҳозир бундай услубдаги футболчи йўқ. Биз 4-2-4 схемасида ўйнаймиз ва ҳақиқий 'ўнлик' етишмаяпти", — деди 24 ёшли ҳужумчи.
Клубдаги ажойиб мавсумга қарамай, ҳар икки юлдуз ҳам мундиални уйдан кузатади. Палмернинг Англия терма жамоасидан четда қолиши кўпчилик учун кутилмаган ҳол бўлди. Томас Тухель бу қарорини плеймейкернинг халқаро даражадаги барқарорлиги етишмаслиги билан изоҳлади. Немис мутахассиси Палмернинг креативлигидан кўра тактик интизомни устун кўрди.
Педро ҳам шунга ўхшаш тақдирга дуч келди. Челси сафида мавсумнинг энг яхши футболчиси деб топилганига қарамай, Карло Анселотти уни таркибга киритмади. Италиялик мутахассис тажрибалироқ вариантларни ва Неймарнинг сафга қайтишини афзал кўрганини айтиб, форвардни таркибдан тушириб қолдирганидан афсусда эканини билдирди.
Шунга қарамай, Педро Анселотти қўллаётган фалсафани қўллаб-қувватлади. Унинг сўзларига кўра, мураббий яккахон юлдузликдан кўра жамоавий кучга кўпроқ эътибор қаратмоқда. "У бир кишини эмас, бутун гуруҳни хоҳлайди. Чунки жамоа бир кишидан кўра кучлироқ деб ҳисоблайди. У ҳамма нарсани ютган, шунинг учун футболчилар унга қулоқ солишади", — дея қўшимча қилди бразилиялик ҳужумчи.
“Zamin”ни Telegram'да ўқинг!
