Килиан Мбаппе кетма-кет иккинчи йил Реал Мадрид жамоасининг мавсумдаги энг яхши футболчиси деб топилди. 27 ёшли ҳужумчи сермаҳсул ўйин кўрсатган бўлса-да, унинг ютуқлари "Сантяго Бернабеу"даги кескин вазият ва совринсиз якунланган мавсум туфайли мухлислар норозилиги соясида қолиб кетди. Бу ҳақда Goal.com хабар беради.
Франциялик юлдуз Ла Лига доирасида 25 та гол уриб, кетма-кет иккинчи марта тўпурар сифатида "Олтин бутса"ни қўлга киритди. Шунингдек, у Чемпионлар лигаси баҳсларида ҳам 15 та гол билан пешқадамлик қилди. Умумий ҳисобда Мбаппе барча мусобақаларда 44 та ўйинда майдонга тушиб, 42 та гол ва 7 та ассист муаллифига айланди. PSJдан эркин агент сифатида ўтганидан бери у 103 ўйинда 86 та гол уришга муваффақ бўлди.
Бироқ, бу шахсий рекордлар Реал Мадрид жамоасининг жамоавий муваффақиятсизликлари фонида юз берди. Клуб сўнгги икки мавсумда Ла Лига, Чемпионлар лигаси, Испания кубоги ва Суперкубогида ғолиб чиқа олмади. Бу ҳолат мухлисларнинг ғазабини келтириб чиқарди. Ҳатто "Реал Оведо"га қарши ўйинда ҳам ишқибозлар Винисиус Жуниор ва Орельен Чуамени каби юлдузларни ҳуштакбозлик билан кутиб олишди.
Клубдаги беқарорлик мураббийлар штабида ҳам кузатилди. Икки йил ичида жамоани учта мутахассис бошқарди: Карло Анселотти ўрнини Хаби Алонсо эгаллади, кейинчалик эса Альваро Арбелоа вақтинчалик бошқарувни қўлга олди. Эндиликда жамоани тартибга солиш учун Хосе Моуриньо иккинчи марта Мадридга қайтиши кутилмоқда.
Килиан Мбаппе энди бор эътиборини Франция терма жамоаси билан 2026-йилги Жаҳон чемпионатига қаратади. Ҳозирда унинг ҳисобида мундиалларда урилган 12 та гол мавжуд бўлиб, у Пеле билан тенглашиб олган. Мирослав Клосе ўрнатган мутлоқ рекордни янгилаш учун унга яна 4 та гол керак бўлади.
“Zamin”ни Telegram'да ўқинг!
