Манчестер Сити ярим ҳимоячиси Родри Реал Мадрид клубининг бўлажак президентлик сайловларида асосий мавзулардан бирига айланди. Президентликка номзод Энрике Рикелме Испания терма жамоаси аъзосини очиқчасига мақтаб, у "қироллик клуби" майдон марказида айнан нима етишмаётганини ифодалашини таъкидлади. Бу ҳақда Goal.com хабар беради.
Рикелме 2024-йилги "Олтин тўп" соҳиби Родри Реал Мадрид учун мукаммал харид бўлишини айтиб, трансфер миш-мишларини авж олдирди. 7-июн куни бўлиб ўтадиган сайловлар олдидан 37 ёшли тадбиркор дунё футболининг энг нуфузли ўйинчиларидан бирига бўлган қизиқишини яширмади. ESPN нашрига берган интервюсида у испаниялик юлдузни ўз она шаҳрига қайтариш ниятида эканини билдирди.
"Менга бу футболчи жуда ёқади; у ажойиб ўйинчи ва Реал Мадрид таркибида бўлиши керак бўлган профилга эга. Аммо у ҳозир бошқа клубда ва биз буни ҳурмат қилишимиз керак. Родри — Реал Мадрид либосида тўп суриши лозим бўлган футболчи. Бу ҳақда шанба кунидан бошлаб батафсил гаплашамиз", — деди Рикелме.
Президентлик пойгаси қизғин паллага кирмоқда ва Рикелме клубнинг йирик трансфер вадалари анъанасига таянмоқда. У аллақачон икки нафар халқаро миқёсдаги юлдуз билан оғзаки келишувга эришганини даъво қилди. Гарчи у Родри исмини расман тасдиқламаган бўлса-да, нишонларидан бири бўлажак Жаҳон чемпионатида Испания шарафини ҳимоя қилишига ишора қилди.
Ушбу стратегия Флорентино Перезнинг 2000-йилдаги машҳур кампаниясини эслатиб юборади. Ўшанда Перез Барселона сафидан Луис Фигони олиб келишга вада бериб, барчани ҳайратда қолдирган эди. Рикелме ўзининг "Галактико" даражасидаги трансферлари мухлисларни ҳаяжонга солишига ва сайловда ғалаба қозонишига ишонмоқда.
“Zamin”ни Telegram'да ўқинг!
