Манчестер Юнайтед ҳимоячиси Диого Далотнинг фикрича, Португалия терма жамоасининг 2026-йилги Жаҳон чемпионатидаги ғалабаси Криштиано Роналдо фаолияти учун муносиб якун бўлади. Кўп қиррали ҳимоячи нафақат Португалия, балки бутун футбол олами афсонавий ҳужумчини қўллаб-қувватлаш учун бирлашишини таъкидлади. Далот ўз ватандошининг халқаро майдондаги сўнгги йирик турнирида эртакнамо якун ясашига ишонч билдирмоқда. Бу ҳақда Goal.com хабар беради.
Роберто Мартинез томонидан эълон қилинган кенгайтирилган таркибдан ўрин олган Далот КазеТВ телеканалига берган интервюсида афсонавий ҳужумчи атрофидаги романтик муҳит ҳақида гапирди. "Менимча, бу нафақат Португалия, балки бутун футбол оламининг истаги. Криштиано нафақат ўз ватани, балки бутун футбол учун қилган ишлари эвазига фаолиятини Жаҳон чемпионати кубоги билан якунлаши жуда гўзал бўлар эди", — деди ҳимоячи.
Далотнинг қўшимча қилишича, Роналдо барча даврларнинг энг буюк футболчиси деб тан олиниши учун бу совринга муҳтож эмас, бироқ ушбу кубок унинг коллекциясига ўзгача кўрк бағишлайди. 2026-йилги турнир Роналдо ва Лионель Месси учун сўнгги глобал кампания бўлиши кутилмоқда. Тўрт йил аввал Қатарда Аргентина билан зафар қучган рақибидан фарқли ўлароқ, 41 ёшли португалиялик юлдуз ҳали ҳам ушбу нуфузли совринни қўлга киритиш иштиёқи билан ёнмоқда.
Криштиано Роналдо халқаро майдонда мисли кўрилмаган натижаларга эга бўлиб, у ўз мамлакати сафида 226 ўйинда 143 та гол урган ҳолда мутлоқ рекордчи ҳисобланади. Португалия терма жамоаси июн ойи бошида йиғинларни бошлайди ва турнир олдидан Чили ҳамда Нигерияга қарши назорат баҳсларида майдонга тушади.
Мартинез шогирдлари гуруҳ босқичида ўзига хос қийинчиликларга дуч келишади. Португалияликлар дастлаб Конго ДР билан куч синашса, кейинги босқич йўлида Ўзбекистон ва Колумбия терма жамоаларига қарши баҳс олиб боришади. Юлдузли таркибга эга "Селесао" плей-офф босқичига йўл олиш ва якунда чемпионликни қўлга киритишни мақсад қилган.
“Zamin”ни Telegram'да ўқинг!
