Интер жамоасининг юлдузи Федерико Димарко 2024-25-йилги омадсиз мавсумдан сўнг ўзини «тугаган» деб ҳисоблаган танқидчиларга муносиб жавоб қайтарди. Италиялик ҳимоячи якунланган мавсумда Интер билан ички чемпионатда «дубл» қайд этди ва А Сериянинг энг яхши футболчиси (MVP) совринини қўлга киритган илк италиялик ўйинчига айланди. Бу ҳақда Goal.com хабар беради.
Димарко учун бу муваффақият осон кечмади. Атиги 12 ой олдин у фаолиятидаги энг оғир даврлардан бирини бошдан кечирган эди. Чемпионлар лигаси финалида Пари Сен-Жермен жамоасидан қабул қилинган 0:5 ҳисобидаги мағлубият ва совринсиз якунланган мавсумдан сўнг, қанот ҳимоячиси кескин танқидлар остида қолган эди. Бироқ 2025-26-йилги мавсумда у 18 та голли узатма ва 7 та гол билан барчани ҳайратда қолдирди.
Кристиан Киву бошқарувидаги жамоа ҳам Скудетто, ҳам Италия кубогини қўлга киритди. Sky Sport нашрига берган интервюсида Димарко ўтган йилги танқидлар унга қаттиқ таъсир қилганини тан олди. «Бу фаолиятимдаги энг яхши мавсум бўлди. Мавсум бошида бундай натижаларга эришишимни тасаввур ҳам қилмагандим. Бу совринни нафақат оиламга, балки ўтган йили мени тугаган деб айтганларга бағишлайман», — деди футболчи.
Димарко ўзига нисбатан айтилган «уни сотиш керак», «фақат 35 дақиқа ўйнай олади», «ҳимояланишни билмайди» деган гаплар оғриқли бўлганини таъкидлади. Шунга қарамай, у майдонда доим 100 фоиз куч билан ҳаракат қилишини исботлади. Миланда туғилган юлдуз учун ўзининг севимли жамоаси сафида бундай ютуққа эришиш алоҳида аҳамиятга эга.
Италия футболи тарихида А Сериянинг ҳозирги форматидаги MVP совринини қўлга киритган илк маҳаллий ўйинчи бўлиш Димарко учун фахрли эканини айтди. «Буни сўз билан таърифлаш қийин. Бу кутилмаган мукофот бўлди ва у йиллар давомида қилган меҳнатларимнинг мевасидир», — дея қўшимча қилди Интер ҳимоячиси.
“Zamin”ни Telegram'да ўқинг!
