Арне Слот Ливерпул бош мураббийлигидан бўшатилганидан сўнг, дарҳол янги иш топиши кутилмоқда. Бир йил аввал Мерсисайд клуби билан Англия Премер-лигаси чемпионлигини қўлга киритган нидерландиялик мутахассис Европанинг энг нуфузли клубларидан бири — Милан бошқарувига асосий номзод сифатида кўрилмоқда. Бу ҳақда Goal.com хабар беради.
Ливерпулни тарк этиши расман эълон қилинганидан бир неча дақиқа ўтиб, Слотнинг Италия гранди билан музокаралар бошлагани ҳақида хабарлар тарқалди. Журналист Сача Таволиери маълумотига кўра, у Сан Сирода Массимилиано Аллегри ўрнини эгаллаши кутилаётган биринчи рақамли номзоддир. Эслатиб ўтамиз, Аллегри жамоа А Серияда бешинчи ўринни эгаллаб, Чемпионлар лигасидан қуруқ қолганидан сўнг истеъфога чиқарилган эди.
Слот Ливерпулдаги икки йиллик фаолияти давомида 113 та ўйинда жамоани бошқариб, 66 та ғалаба қайд этди. Унинг энг катта ютуғи 2024-25 йилги мавсумда қўлга киритилган Англия чемпионлиги бўлди. Бироқ, сўнгги вақтларда мухлислар билан муносабатларнинг ёмонлашиши ва ўйин услубининг зерикарли деб топилиши унинг кетишига сабаб бўлди.
Клубдаги ички муҳит ҳам анча таранглашган эди. Хусусан, Муҳаммад Салах ва мураббий ўртасидаги келишмовчиликлар юзага келган, мисрлик юлдуз жамоанинг аввалги, яни Жюрген Клопп давридаги ҳужумкор футболига қайтишини очиқчасига талаб қилган эди. Эндиликда Милан раҳбарияти бошқа даъвогарлар пайдо бўлмасидан аввал Слот билан келишувга эришишга ҳаракат қилмоқда.
“Zamin”ни Telegram'да ўқинг!
