Арсенал жамоасининг собиқ ярим ҳимоячиси Самир Насри Чемпионлар лигаси финалида PSJга қарши кечган баҳсда ҳакамлар Лондон клубини атайлаб "жазолаганини" иддао қилди. Франциялик собиқ футболчининг фикрича, учрашув бош ҳаками иккинчи бўлимда Микел Артета шогирдларига қарши қарорлар чиқара бошлаган. Бу ҳақда Goal.com хабар беради.
Будапештда бўлиб ўтган драматик финалда асосий вақт 1:1 ҳисобида якунланди, пеналтилар сериясида эса Габриел Магалҳаес хатога йўл қўйиб, кубокни парижликларга бой берди. Насри Канал+ телеканалидаги чиқишида ҳакамнинг ҳаракатларини танқид қилди: "Иккинчи бўлимда ҳакам тизимли равишда Арсенал зарарига ҳуштак чалди. У жамоани биринчи бўлимдаги вақт чўзишлар учун жазолади", — деди у.
Учрашувнинг олтинчи дақиқасида Кай Хаверц ҳисобни очганидан сўнг, Арсенал ҳимоявий блок орқали рақибни асабийлаштиришга ҳаракат қилган эди. Насри айнан шу тактика ҳакамларнинг муносабатига салбий таъсир қилган деб ҳисоблайди. Бироқ, у қўшимча бўлимларда Нони Мадуеке ва Нуно Мендес ўртасидаги тўқнашувда пеналти белгиланмаганини "скандал" деб атамади.
"Агар ҳакам пеналти белгилаганида, VAR буни бекор қилмасди. Лекин нуқтага ишора қилмагани ҳам катта хато эмас", — дея тушунтирди Насри. Шу билан бирга, у Луис Энрике бошқарувидаги PSJнинг тактик хотиржамлигини юқори баҳолади. Унинг сўзларига кўра, испан мураббийи ҳисобда ортда қолаётган бўлса-да, таваккал қилмасдан ўз режасига содиқ қолган.
Эслатиб ўтамиз, PSJ иккинчи бўлимда Усман Дембеле томонидан амалга оширилган пеналти эвазига мувозанатни тиклаган эди. Якунда парижликлар ўз тарихларида кетма-кет иккинчи бор Европанинг энг нуфузли клублар ўртасидаги турнирида ғолибликни қўлга киритишди.
“Zamin”ни Telegram'да ўқинг!
