Барселона ва Испания терма жамоасининг ёш юлдузи Ламине Ямал ўзининг Лионель Месси ҳамда Криштиано Роналдо билан солиштирилишига муносабат билдирди. 17 ёшли иқтидор соҳиби Евро-2024 турниридаги ғалабадан сўнг жаҳон футболининг марказий фигурасига айланди. Унинг майдондаги ҳаракатлари ва муҳим ўйинларда натижа кўрсата олиш қобилияти кўплаб мутахассисларни афсонавий футболчилар билан параллел ўтказишга мажбур қилмоқда. Бу ҳақда Goal.com хабар беради.
FIFA нашрига берган интервюсида Ламине Ямал ўзининг асосий мақсадини очиқлади: “Менинг мақсадим улар билан солиштирилиш эмас, балки улар билан бир қаторда тилга олинишдир. Келажакда кимдандир энг яхшилар ҳақида сўрашса, менинг исмим ҳам Лионель Месси ва Криштиано Роналдо билан бирга айтилишини хоҳлайман”. Ёш вингер ўзининг шахсий ривожланишига эътибор қаратиш ва ортиқча босимдан қочиш муҳимлигини таъкидлади.
Ямалнинг фикрича, бошқалар билан доимий солиштириш футболчининг ўсишига тўсқинлик қилиши мумкин. “Агар ўзингизни бошқалар билан солиштиришга берилиб кетсангиз, бу ўзингизга зарар келтириши мумкин. Мен ўз йўлимни топишни, ўйиндан завқланишни ва одамларга табассум улашишни истайман. Фаолиятимни якунлаганимда эса, инсонлар менинг ўйинларимни қайта-қайта томоша қилишларини орзу қиламан”, — дея қўшимча қилди Барселона ҳужумчиси.
Шунингдек, Ламине Ямал Испания терма жамоасининг келажакдаги режалари ҳақида ҳам тўхталиб ўтди. Унинг сўзларига кўра, Европа чемпионлигидан сўнг жамоада хотиржамликка берилиш йўқ. У жаҳон чемпионатида Аргентина, Франция, Португалия ва Англия каби кучли рақиблар борлигини, бироқ Испания энг чиройли футбол намойиш этаётганига ишонишини билдирди.
“Zamin”ни Telegram'да ўқинг!
