Май ойи бошида Ер аҳолиси йилнинг энг машҳур метеорлар ёмғирларидан бири — Эта-Акваридлар чўққисини кузатди. Ушбу ҳодиса сайёрамиз машҳур Галлей кометаси (1П/Ҳаллей) ўз орбитаси бўйлаб ҳаракатланаётганда қолдирган чанг булути орқали ўтиши натижасида юзага келади. Бу ҳақда Ixbt.com хабар беради.
Метеорлар оқимининг энг юқори фаоллиги 4-майдан 6-майгача бўлган даврга тўғри келди. Жанубий яримшарда қулай об-ҳаво шароитида соатига 60 тагача метеор кўринган бўлса, Шимолий яримшарда бу кўрсаткич соатига 10 тани ташкил этди. Кузатувларга ёрқин ой нури ҳам маълум даражада халақит берди.
Гарчи асосий чўққи ортда қолган бўлса-да, метеорлар оқими май ойининг охиригача давом этади. Астрономларнинг фикрича, 27–28-май кунларигача алоҳида метеорларни кузатиш имконияти сақланиб қолади, ой нури камайиши билан кузатув шароитлари янада яхшиланади.
Метеорлар оқими радианти Водолей юлдуз туркумида жойлашган бўлиб, айнан шу нуқтадан метеорлар осмонга «сочилиб» чиқаётгандек туюлади. Мутахассислар кузатув учун тонгги соатларни энг қулай вақт деб ҳисоблашади, чунки бу вақтда радиант уфқдан юқорироқ кўтарилади.
Ёзда астрономик ҳодисалар давом этади: июль ойида Жанубий дельта-Акваридлар ва Альфа-Каприкорнидлар фаоллашса, август ойида Шимолий яримшарнинг энг машҳур метеорлар ёмғири — Персеидлар чўққисига етади.
“Zamin”ни Telegram'да ўқинг!
