Airbnb компанияси 2026-йилнинг биринчи чораги учун молиявий ҳисоботида сунъий интеллект технологияларидан фойдаланиш кўрсаткичларини эълон қилди. Компания муҳандислари томонидан ёзилган кодларнинг 60 фоизи айнан сунъий интеллект ёрдамида яратилгани маълум бўлди. Бу кўрсаткич Google, Microsoft ва Spotify каби технология гигантларининг дастурлаш жараёнларини тезлаштириш борасидаги ёндашувларига ҳамоҳангдир. Бу ҳақда Techcrunch.com хабар беради.
Компания бош директори Бриан Ческй сунъий интеллект айниқса API ҳамкорлари учун воситалар яратишда катта самара бераётганини таъкидлади. Илгари 20 кишилик муҳандислар жамоаси талаб қилинган вазифаларни эндиликда назорат остида ишловчи сунъий интеллект агентлари ёрдамида биргина мутахассис бажариши мумкин. Бу эса компанияга авваллари ресурс етишмаслиги сабабли амалга оширилмаган лойиҳаларни тезроқ ишга тушириш имконини бермоқда.
Мижозларни қўллаб-қувватлаш хизматида ҳам сунъий интеллектнинг ўрни ортиб бормоқда. Ҳозирда Airbnb ботлари мурожаатларнинг 40 фоизини инсон аралашувисиз ҳал қилмоқда. Шунга қарамай, Бриан Ческй саёҳат ва электрон тижорат соҳаларида чатботлар дизайни ҳали мукаммал эмаслигини тан олди. Унинг фикрича, матнга асосланган чатботлар визуал маълумотлар ва хариталар муҳим бўлган саёҳат платформалари учун тўлиқ мослашмаган.
Молиявий кўрсаткичларга кўра, Airbnb соф фойдаси 3,9 фоизга ўсиб, 160 миллион долларни ташкил этди, даромад эса 18 фоизга ошиб, 2,7 миллиард долларга етди. Шунингдек, "Ҳозир банд қилинг, кейин тўланг" функцияси умумий брон қилиш қийматининг қарийб 20 фоизини ташкил этиб, фойдаланувчилар орасида юқори қизиқиш уйғотди.
“Zamin”ни Telegram'да ўқинг!
