Германиянинг автомобил ишлаб чиқарувчи гиганти Porsche савдо ҳажмининг пасайиши ва фойданинг камайиши фонида ўзининг учта шоъба корхонасини ёпишини эълон қилди. Энг кўзга кўринган йўқотиш бу батареялар ишлаб чиқарувчи Селлфорсе Груп бўлиб, компания эндиликда ўз батареяларини ишлаб чиқаришдан воз кечиб, ташқи етказиб берувчиларга таянишга қарор қилди. Бу ҳақда Techcrunch.com хабар беради.
Шунингдек, электр велосипедлар учун узатмалар тизимини ишлаб чиқувчи Porsche эБике Перформансе ҳамда Volkswagen Груп учун дастурий таъминот билан шуғулланувчи Сетитек компаниялари ҳам фаолиятини тўхтатади. Ушбу қарор натижасида 500 дан ортиқ ходим иш ўрнини йўқотади.
Porsche бош директори Майкл Леитерс компаниянинг асосий бизнес йўналишларига қайтиши ва стратегик жиҳатдан қайта шаклланиши зарурлигини таъкидлади. Компания раҳбарияти Porsche'ни янада чаққон ва самаралироқ қилиш учун харажатларни қисқартиришга мажбур бўлмоқда.
Компания сўнгги вақтларда Шимолий Америка, Хитой ва Европа бозорларида сотувлар ҳажми кескин пасайганидан азият чекмоқда. Хусусан, Хитой бозорида етказиб бериш ҳажми 21 фоизга қисқарган. Porsche ушбу қийинчиликларни электр транспорт воситаларига ўтиш жараёнидаги муаммолар билан боғламоқда.
“Zamin”ни Telegram'да ўқинг!
