Elon Musk асос солган SpaceX компанияси ўзининг энг йирик Starship В3 ракетаси ҳақида янги маълумотларни ошкор қилди. Янги авлод ракетаси парвоз ва синов жараёнларини ҳар томонлама назорат қилиш имконини берувчи 50 та камера билан жиҳозланган. Таққослаш учун, Starship В2 моделларида одатда 20 тадан 30 тагача камера ўрнатилган бўлиб, янги кўрсаткич диагностика имкониятларини сезиларли даражада оширади. Бу ҳақда Ixbt.com хабар беради.
Камералар сонининг кўпайиши SpaceX муҳандисларига ракета конструкцияси, двигателлар ва иссиқликдан ҳимояловчи қопламаларнинг реал вақт режимида қандай ишлашини аниқроқ кузатиш имконини беради. Бу маълумотлар келгусидаги парвозларни янада хавфсизроқ ва самаралироқ қилиш учун муҳим аҳамиятга эга.
Шунингдек, тизимга Starlink сунъий йўлдош алоқаси интеграция қилинган бўлиб, у 480 Мбит/с гача бўлган тезликда маълумот узатишни таъминлайди. Юқори тезликдаги ушбу канал катта ҳажмдаги визуал ва техник маълумотларни Ерга кечикишларсиз юбориш имконини беради.
Elon Muskнинг сўзларига кўра, Starship ракетасининг навбатдаги версияси ҳозиргисидан ҳам баландроқ бўлиб, унинг баландлиги 150 метрга етиши мумкин. Мазкур янгиланишлар шунчаки кичик ўзгаришлар эмас, балки бутун тизимни тубдан қайта ишлаш жараёнидир. Ракетанинг навбатдаги синов парвози 20-май санасига режалаштирилган.
“Zamin”ни Telegram'да ўқинг!
