TikTok бугунги кунда шунчаки ижтимоий тармоқ гиганти бўлишдан тўхтаб, кенг қамровли экотизимга айланиб бормоқда. Видео платформа ўз ичига TikTok Шоп, маҳаллий қидирув хариталари, ўйинлар ва бошқа кўплаб функцияларни қўшиб келаётган эди. Эндиликда компания меҳмонхоналарни банд қилиш хизматини йўлга қўйди ва финтеч лицензиясини олишга киришди. Бу қадамлар TikTok'нинг Хитойдаги WeChat каби барча рақамли эҳтиёжларни бир жойда жамловчи “супер илова”га айланиш стратегиясини англатади. Бу ҳақда Techcrunch.com хабар беради.
Яқинда АҚШда ишга туширилган TikTok ГО хизмати фойдаланувчиларга меҳмонхоналар ва туристик масканларни бевосита илова ичида топиш ҳамда банд қилиш имконини беради. Илгари фойдаланувчилар қизиқарли жойларни кўриб, бошқа сайтларга ўтишга мажбур бўлган бўлса, энди TikTok барча жараённи ўзида жамламоқда. Бу эса платформани нафақат ижтимоий тармоқ, балки Google Search ва Google Maps каби хизматларнинг жиддий рақобатчисига айлантирмоқда.
Бундан ташқари, TikTok молия бозорига ҳам фаол кириб бормоқда. Reuters хабарига кўра, компания Бразилия марказий банкига тўлов хизматлари ва кредитлаш фаолияти билан шуғулланувчи технологик компания сифатида ишлаш учун ариза топширган. Кутилаётган лицензиялар фойдаланувчиларга пул сақлаш, ўтказмаларни амалга ошириш ва ҳатто кредит олиш имкониятини тақдим этади.
TikTok'нинг ушбу трансформацияси фойдаланувчиларнинг илова ичида ўтказадиган вақтини кўпайтириш ва янги даромад манбаларини яратишга қаратилган. Компания шунчаки кўнгилочар контент платформаси бўлишдан чиқиб, электрон тижорат, туризм ва молия соҳаларини бирлаштирган ягона рақамли манзилга айланишни мақсад қилган.
“Zamin”ни Telegram'да ўқинг!
