Ҳар бир инсон соғлом ва узоқ умр кўришни истайди. Бунинг учун ҳаёт тарзида баъзи муҳим одатларни шакллантириш зарур. Америкалик иммунолог ва оилавий шифокор доктор Ҳелен Мессйенинг таъкидлашича, узоқ ва соғлом яшашнинг тўрт асосий омили мавжуд. Булар — касалликларни эрта аниқлаш, юрак-қон томир ва метаболик саломатликни яхшилаш, яллиғланишларга қарши кураш ҳамда когнитив ва жисмоний бардошни сақлашдир.
Касалликларни эрта аниқлаш
Соғлом умрни таъминлаш учун биринчи навбатда организмдаги ўзгаришларни кузатиб бориш керак. Мунтазам равишда қон босими, қондаги шакар ва холестерин миқдори, оғирлик ва бел айланаси каби кўрсаткичларни текшириш зарур. Бу оддий текширувлар турли патологияларнинг илк белгиларини ўз вақтида аниқлашга ёрдам беради. Шунингдек, мунтазам тиббий кўрикдан ўтиш ҳам муҳим саналади.
Саломатликни мустаҳкамлаш
Соғлом ҳаёт кечиришнинг муҳим омили — кундалик фаоллик ва тўғри овқатланишдир. Доктор Ҳелен Мессйе кундалик одатлар қаторига жисмоний фаоллик, сифатли уйқу, тўйинтирувчи овқатланиш, стрессни назорат қилиш ва доимий мулоқотни киритишни тавсия этади. Бу одатлар соғлиққа ижобий таъсир кўрсатади ва инсон организмини узоқ муддатда мустаҳкамлайди.
Тўғри овқатланиш
Овқатланишда антиоксидантларга бой маҳсулотлардан фойдаланиш тавсия этилади. Антиоксидантлар ҳужайраларни фаол кислород шакллари ва яллиғланишдан ҳимоя қилади. Улар кўпроқ чой, қаҳва, мевалар, сабзавотлар, какао маҳсулотлари ва фойдали ёғлар — балиқ ҳамда ёнғоқларда мавжуд. Шунингдек, меъёрли овқатланишга аҳамият қаратиш ва зарарли маҳсулотлардан қочиш лозим.
Жисмоний фаоллик ва бардош
Жисмоний фаоллик юрак хасталиклари, семириш ва қандли диабетнинг олдини олишга ёрдам беради. Мутаҳассислар кундалик ҳаётда куч машқлари, пиёда юриш, велосипед ҳайдаш ва сузишни амалга оширишни тавсия этади. Бундан ташқари, йога машғулотлари инсоннинг эгилувчанлик ва мувозанат қобилиятини ривожлантиради. Бу айниқса ёши катта инсонлар учун муҳим бўлиб, йиқилиш ва суякни синдириб олиш хавфини камайтиради.
Соғлом ва узоқ умр кўриш учун организмга эътибор қаратиш, мунтазам текширувлардан ўтиш, тўғри овқатланиш, жисмоний фаоллик ва руҳий саломатликни сақлаш зарур. Бу одатларни ҳаёт тарзига айлантирган инсонлар соғлиқларини мустаҳкамлаб, узоқ ва бахтли ҳаёт кечиришлари мумкин.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
