Йиғлаш кўпчиликка заифлик ёки ҳассослик белгиси бўлиб туюлиши мумкин. Бироқ олимлар олиб борган илмий изланишлар шуни кўрсатадики, кўз ёши тўкиш инсон саломатлиги учун бир қатор ижобий таъсирларга эга. Миннесота штатида ўтказилган тадқиқотга кўра, йиғлаш стресс пайтида танамизда тўпланадиган кимёвий моддаларни чиқаришга ёрдам беради. Шу боис одам йиғлаб олгандан кейин ўзини енгил ва руҳан яхши ҳис қилади.
Йиғлаш нафақат организмдаги зарарли моддалардан халос бўлишни таъминлайди, балки кайфиятни кўтариш, қийин вазиятларни енгиб ўтишда руҳий ёрдамчи вазифасини бажаради. Фрейд назариясига кўра, инсоннинг ички ҳис-туйғулари ифода этилиши зарур, чунки уларни ичига жамлаб қўйиш жисмоний ёки руҳий саломатликка салбий таъсир қилиши мумкин.
Кўз ёши орқали инсон атрофидаги одамлар билан кучлироқ алоқа ўрнатиши мумкин. Агар сиз йиғлаётган пайтингизда ёнингизда сизни қўллаб-қувватлайдиган ва қайғуриб ёрдам берувчи инсон бўлса, бу муносабатларингизни янада самимий ва мустахкам қилади.
Йиғлаш кўп жиҳатдан фойда келтиради: қуруқ кўзларни намлаб, уларнинг соғлом ишлашини таъминлайди, кўзга тушган турли тингловчи ёки зарарли моддаларни чиқариб юборишга ёрдам беради. Шу билан бирга, кўз ёшининг антибактериал хусусиятлари инфекцияларнинг олдини олади.
Бундан ташқари, йиғлаш вақтида организмда эндорфинлар — “бахт гормонлари” ишлаб чиқилади. Улар нафақат кайфиятни кўтаради, балки оғриқни ҳам енгиллаштиради. Йиғлаш шу боис юрак-қон томир, ошқозон, суяк ва мушакларда ортиқча гормонларни йўқотиш орқали саломатликка ижобий таъсир кўрсатади.
Хулоса қилиб айтганда, кўз ёши инсон учун табиий ва соғлом жараёндир. У нафақат руҳий енгиллик, балки жисмоний соғломликни ҳам таъминлайди. Шунинг учун, ҳис-туйғуларингизни босишдан кўра, уларни эркин ифода этиш — соғлиғингиз учун фойдали қадам ҳисобланади.
«Замин»ни Telegram’да ўқинг!
