Чаканда (облепиха) мевасидан тайёрланган совун сўнгги йилларда соғлом турмуш тарафдорлари орасида машҳурликка эришмоқда. Бу бежиз эмас, чунки чаканда тери учун ҳақиқий шифо манбаи ҳисобланади.
Аввало, чаканда ёғи таркибида А, Е, C ва К витаминлари, шунингдек, табиий антиоксидантлар жуда кўп. Шу сабабли бундай совун терини чуқур озиқлантиради, қуриб қолишдан ҳимоя қилади ва майда ажинларнинг олдини олади.
Яна бир муҳим жиҳати — чаканда совуни яллиғланишга қарши хусусиятга эга. У ҳуснбузар ва майда яраларни тезроқ битишига ёрдам беради, терини тинчлантиради. Шу билан бирга, терига табиий ёрқинлик бахш этиб, уни соғлом кўринишда сақлаб туради.
Мутахассислар айниқса қуруқ, сезгир ёки ташқи муҳитдан тез таъсирланадиган тери эгалари учун чаканда совунидан фойдаланишни тавсия этишади. Ундан мунтазам фойдаланиш терини юмшоқ, силлиқ ва жилвали қилади.
Чаканда совуни — кимё аралашмасиз, табиий воситалар орқали гўзалликка эришишни истаганлар учун энг яхши танловлардан биридир.
