Соғлиқни сақлаш вазирлиги ижтимоий тармоқларда тарқалган, болалар орасида қайт қилиш ва ич кетиш белгилари билан кечаётган вирусли касаллик ҳақидаги хабарларга расмий изоҳ берди. Расмий маълумотда таъкидланишича, бу ҳолатлар хавотирга асос бермайди ва куз фаслида кўп учрайдиган одатий ўткир респиратор вирусли инфекциялар (ЎРВИ) билан боғлиқ.
Вазирлик маълумотига кўра, ҳар йили куз ва қиш мавсумларида ҳаво ҳарорати пасайиши сабабли вирусли касалликлар сони табиий равишда кўпайиши кузатилади. Бу инфекциялар турли кўринишда кечиши мумкин: айрим болаларда йўтал, иситма ва бурун битиши бўлса, бошқаларида ошқозон-ичак тизимидаги бузилишлар — яъни қайт қилиш ёки ич кетиш белгиларини келтириб чиқаради.
Мутахассислар бу ҳолат вирус штаммларининг хилма-хиллиги билан боғлиқ эканини таъкидлашмоқда. Ҳар мавсумда вирус турлари биологик жиҳатдан фарқ қилади ва улар инсон организмига турлича таъсир кўрсатади.
Соғлиқни сақлаш вазирлиги шунга эътибор қаратдики, бу ҳолатларни коронавирус мутацияси билан боғлаш нотўғри ва илмий асосга эга эмас. “Бугунги кунда COVID-19 ўзининг оғир шаклини йўқотган ва оддий респиратор инфекция даражасига айланган. Мамлакатимизда эпидемиологик вазият тўлиқ барқарор”, — дейилади баёнотда.
Вазирлик қўшимча қилишича, Ўзбекистон бўйлаб тиббиёт муассасаларида ўткир респиратор вирусли касалликларни даволаш учун етарли миқдорда ўрин-жой, дори-дармон ва зарур ускуналар захираси мавжуд. Шунингдек, эпидемиологик вазият доимий равишда мониторинг қилиниб, тезкор назорат остида сақланмоқда.
Мутасаддилар аҳолидан ортиқча хавотирга тушмасликни сўраб, айни вақтда болаларда шундай белгилар кузатилганда ўз вақтида шифокорга мурожаат қилишни тавсия этди. “Ота-оналар фарзандларида қайт қилиш, иситма ёки бошқа инфекция белгилари сезса, ўзи билан эмас, оилавий шифокор кўригига мурожаат қилсин. Ўзбошимчалик билан дори қабул қилиш ёки уй шароитида даволаш хавфли бўлиши мумкин”, — дейилади расмий маълумотда.
Шу билан бирга, ССВ аҳолини соғлом турмуш тарзига амал қилиш, қўл гигиенасига риоя этиш, жамоат жойларида ниқоб тақиш ва организмни вирусларга қарши мустаҳкамлаш учун витаминли овқатлар истеъмол қилишга чақирди.
Хулоса қилиб айтиш мумкинки, Ўзбекистондаги эпидемиологик ҳолат барқарор бўлиб, ҳеч қандай фавқулодда хавф йўқ. Куз мавсумида кузатилаётган бу вирусли ҳолатлар табиий жараён бўлиб, тиббиёт тизими бу борада тўлиқ тайёр ҳолатда эканлиги таъкидланди.
Шу тариқа, Соғлиқни сақлаш вазирлиги тарқалган хабарларга ойдинлик киритди ва аҳолини вазиятни тўғри баҳолашга, ортиқча шов-шувга берилмасликка ҳамда тиббий тавсияларга амал қилишга чақирди.
“Zamin”ни Telegram'да ўқинг!
