Ўзбекистон Фанлар академиясининг Полимерлар кимёси ва физикаси институти олимлари халқаро ҳамкорлари билан биргаликда яраларни тез тузатувчи янги гидрогел ишлаб чиқишди. Ушбу гидрогел инфекцияланган яраларни даволаш учун мўлжалланган бўлиб, у яраларнинг яллиғланишини камайтиради ва тўқималар регенерациясини тезлаштиради.
Гидрогелнинг асосий хусусиятлари — юқори ёпишувчанлик, эластиклик, антибактериал ва антиоксидант хусусиятларга эга. У ярани ташқи омиллардан ҳимоя қилиб, бактерияларга қарши самарали таъсир кўрсатади ва яра битишини рағбатлантиради.
Тадқиқот натижалари халқаро “Chemical Engineering Journal” илмий журналда эълон қилинди ва жаҳон илмий жамоатчилиги томонидан эътироф этилди. Мазкур гидрогелни ишлаб чиқишда поливинил спирт, мидия мусини, темир ионлари ва артемизинин ишлатилган. Бу унинг механик мустаҳкамлигини таъминлайди.
Техника фанлари доктори, профессор Ҳайдар Юнусовнинг таъкидлашича, гидрогел анъанавий боғламалардан фарқли равишда фақат ярани ёпиш билан чекланмайди, балки у бактерияларга қарши таъсир кўрсатади, яллиғланишни назорат қилади ва тўқималар учун қулай муҳит яратади.
“Zamin”ни Telegram'да ўқинг!
