Ўзбекистонда гепатит “С” вирусига қарши дори воситасини маҳаллий ишлаб чиқариш масаласи кун тартибига чиқди. Бу ташаббус Мисрнинг йирик компанияларидан бири томонидан илгари сурилгани айтилди. Мутасаддиларга лойиҳани бошлаш бўйича топшириқлар берилди.
Шу йўналишдаги ҳамкорлик фақат фармацевтика билан чекланмаяпти. Жорий йилда Миср тажрибаси асосида Китоб туманида 5 гектарда “супер-супер элита” картошка уруғлиги етиштирилиб, 100 тонна ҳосил олингани маълум қилинди. Музокаралар натижасида мисрлик инвесторлар бу ишни 1 минг гектаргача кенгайтиришга тайёр экани қайд этилди.
Яна бир таклиф Тупроққалъа билан боғлиқ: Миср компанияларидан бири 2 минг гектар чўл майдонини фойдаланишга киритиш ва пивот суғориш ускуналарини ишлаб чиқаришни йўлга қўйишни таклиф қилган. Бу эса нафақат ҳосилдорлик, балки техника ишлаб чиқариш орқали саноатга ҳам туртки бўлиши мумкин.
Умуман олганда, учрашувларда Африка қитъасини янги экспорт йўналиши сифатида фаолроқ очиш зарурлиги таъкидланди. Африка 50 дан ортиқ давлатни қамраб олади ва иқтисодиёти 3 триллион долларга тенг экани эслатилди. Ташқи ишлар, Инвестиция, саноат ва савдо вазирликлари ҳамда Миср ва Қатардаги элчиларга тегишли “йўл харитаси”ни тайёрлаш ва тасдиқлаш топширилди.
“Zamin”ни Telegram'да ўқинг!
