Юздаги “қора нуқталар” нима ва нега пайдо бўлади?
Тиббий тилда комедонлар деб аталувчи қора нуқталар тери тешикчаларининг ёғ ва ўлик ҳужайралар билан тўлиб қолиши ҳамда ҳаво таъсирида оксидланиши натижасида юзага келади. Бу ҳолатнинг келиб чиқишига ёғли тери тури, гормонал ўзгаришлар, стресс ҳамда нотўғри парвариш ва оғир косметика воситалари таъсир қилади. Уларни қўл билан сиқиб чиқариш инфексия, яллиғланиш ва из қолишига олиб келиши сабабли энг катта хато ҳисобланади.
Фото: Yandex
Кўпчилик “қора доғ” деб ўйлайдиган муаммо аслида бошқача — бу русча айтганда “чёрние точки”, тиббий тилда эса комедонлар деб аталади. Улар асосан бурун, пешона ва ияк атрофида кўпроқ учрайди.
Қора нуқталарнинг асосий сабаби — тери тешикчаларининг ёғ (себум) ва ўлик ҳужайралар билан тўлиб қолиши. Тешикча очиқ бўлгани учун ундаги модда ҳаво билан реакцияга киришиб, оксидланади ва қора рангга киради. Яъни бу ифлослик эмас, балки кимёвий жараён натижаси.
Бу муаммонинг келиб чиқишига бир нечта омиллар таъсир қилади. Масалан, ёғли тери тури бўлганларда себум кўпроқ ишлаб чиқарилади. Гормонал ўзгаришлар — айниқса ўсмирлик даврида ёки стресс пайтида — буни кучайтиради. Шунингдек, нотўғри парвариш, оғир косметика воситалари ва тешикчаларни тўсиб қўювчи кремлар ҳам қора нуқталарни кўпайтириши мумкин.
Энг катта хато — уларни қўл билан сиқиб чиқариш. Бу инфекция киришига, яллиғланиш ва ҳатто из қолишига олиб келиши мумкин.
Қора нуқталардан халос бўлиш учун терига тўғри қараш муҳим: юмшоқ тозалаш, ҳафтасига 1–2 марта енгил скраб ёки кислотали (масалан, салицил кислотали) воситалардан фойдаланиш ва энг муҳими — тешикчаларни ёпиб қўймайдиган косметика танлаш.
Агар муаммо кучли бўлса, косметолог ёки дерматологга мурожаат қилиш тўғри қарор бўлади. Чунки баъзи ҳолларда профессионал тозалаш ёки даволовчи воситалар талаб этилади.
“Қора нуқталар” — бу оддий ҳолат, лекин тўғри парвариш билан уларни назорат қилиш мумкин.
Изоҳлар 0
…