Mini brendi o'zining dizayn bo'yicha yangi rahbari Holger Hampf boshchiligida muhim yangilanishlar bosqichiga tayyorgarlik ko'rmoqda. BMW Group terminologiyasida "Life Cycle Impulse" deb ataluvchi bu jarayon brend uchun yangi davrni boshlab beradi. Garchi Cooper va Countryman 2023-yilda, Aceman esa bir yil o'tib taqdim etilgan bo'lsa-da, kompaniya mijozlar fikr-mulohazalariga tayanib, modellarni yanada takomillashtirishni maqsad qilgan. Bu haqda Autocar.co.uk xabar beradi.
Hampfning so'zlariga ko'ra, yaqin kelajakda Mini o'zining cheklangan modellar qatorini yangilab turish uchun turli xil hamkorlik loyihalari va maxsus versiyalarga alohida e'tibor qaratadi. Bu strategiya avtomobillarni shunchaki yangilash emas, balki ularni mijozlarning turmush tarziga moslashtirish va brend atrofida hikoya yaratishga xizmat qiladi.
Kompaniya shuningdek, tabiat qo'ynida dam olishni xush ko'ruvchilar uchun off-road uslubidagi yangi variantni ishlab chiqmoqda. Katta ehtimol bilan, to'rt g'ildirakli tortish tizimiga ega Countryman modeli ushbu loyiha uchun asos bo'ladi. Shu bilan birga, John Cooper Works (JCW) sub-brendi ostidagi sport modellari ham yanada o'ziga xos va tajovuzkor dizaynga ega bo'lishi kutilmoqda.
Kelajakdagi yangilanishlar va yangi avlod modellari 2030-yillarning boshlarida bozorga chiqishi rejalashtirilgan. Mini o'zining an'anaviy xatchbek va krossoverlarida texnik va vizual o'zgarishlarni amalga oshirish orqali raqobatbardoshligini saqlab qolishni ko'zlamoqda.
“Zamin”ni Telegramʻda oʻqing!
