«Tesla» компанияси раҳбари Илон Маск янги авлод «Роадстер» модели ҳақида кутилмаган маълумотларни ўртоқлашди. 2026 йил 22 апрель куни бўлиб ўтган чораклик ҳисобот анжуманида Маск ушбу электромобиль компаниянинг қўлда бошқариладиган, яъни рулли охирги автомобили бўлишини таъкидлади. Келажакда ишлаб чиқариладиган барча моделлар тўлиқ автоном бошқарувга ўтиши режалаштирилган. Бу ҳақда Ixbt.com хабар беради.
Янги «Роадстер» техник жиҳатдан ҳайратланарли кўрсаткичларга эга бўлиши кутилмоқда. «SpaceX» ракета технологиялари билан жиҳозланадиган ушбу машина атиги 1,1 сония ичида 100 км/соат тезликка чиқа олади. Маск аввалроқ берган интервюларида ҳатто автомобилни ҳавода муаллақ туришга мажбур қилиш нияти борлигини ҳам айтиб ўтган эди. Ҳозирда муҳандислар хавфсизлик чораларини кўриш устида ишламоқда.
Лойиҳа узоқ вақтдан бери кечикаётганига қарамай, унинг тақдимоти яқин бир ой ичида ўтказилиши мумкин. Автомобилнинг бошланғич нархи 200 000 доллар этиб белгиланган, махсус «Фоундерс Сериес» серияси учун эса 250 000 доллар миқдорида тўлиқ депозит талаб этилади. Баъзи мижозлар ушбу тўловни 2017 йилда амалга оширган бўлиб, деярли ўн йилдан бери ўз машиналарини кутмоқда.
Компания режаларига кўра, «Роадстер» моделини оммавий ишлаб чиқариш 2027 ёки 2028 йилдан олдин бошланмайди. Бу лойиҳа «Tesla» тарихидаги энг мураккаб ва энг кўп вақт талаб қилган ишланма бўлиб қолмоқда. Ҳозирда мутахассислар намойиш пайтида ҳеч қандай муаммо келиб чиқмаслиги учун кўплаб синов ва текширувларни амалга оширмоқда.
“Zamin”ни Telegram'да ўқинг!
