Хитойнинг КАТАРК давлат тадқиқот маркази экстремал совуқ шароитларда ақлли транспорт воситаларини синовдан ўтказиш учун дунёдаги энг йирик базани қуришни бошлади. Ички Мўғулистон автоном туманида жойлашадиган ушбу мажмуа 2028-йилга келиб тўлиқ ишга туширилиши режалаштирилган. 67 гектар майдонни эгаллайдиган ИКНEВ номли мазкур полигон электромобиллар, автоном бошқарув тизимлари ва замонавий рақамли платформаларни қамраб олади. Бу ҳақда Ixbt.com хабар беради.
Лойиҳанинг энг муҳим жиҳати — ёпиқ ҳудудда сунъий қор ҳосил қилиш тизимидир. Бу дунёдаги биринчи шундай марказ бўлиб, муҳандисларга қор ёғиши, муз қопламининг сирпанчиқлиги ва ҳарорат каби параметрларни назорат остида бошқариш имконини беради. Бу эса автомобилларнинг аккумулятор тизимлари ва электрон бошқарув блокларини турли қишки шароитларда аниқ синовдан ўтказишга хизмат қилади.
КАТАРК вице-президенти Ли Вейнинг таъкидлашича, янги база электромобиллар саноатидаги асосий муаммолардан бири — совуқ ҳавода техниканинг ишончлилигини стандартлаштириш масаласини ҳал қилади. Ҳозирги кунда синовлар кўп жиҳатдан табиий об-ҳавога боғлиқ бўлиб, бу жараённи секинлаштиради. Янги мажмуа эса қайта тикланадиган ва аниқ ўлчанадиган синов муҳитини яратиш орқали хавфсизлик стандартларини янги босқичга олиб чиқади.
Хитойда электромобиллар бозори жадал ўсиб бормоқда: 2025-йилда мамлакатда 16,6 миллиондан ортиқ электромобил ва гибрид ишлаб чиқарилган. Ушбу технологик база Хитой автомобилсозлик саноатининг Европа ва Шимолий Америка каби совуқ иқлимли ҳудудлардаги рақобатбардошлигини оширишда стратегик аҳамият касб этади.
“Zamin”ни Telegram'да ўқинг!
