AvtoVAZнинг собиқ муҳандиси, ижтимоий тармоқларда ХаДм тахаллуси билан танилган мутахассис ўзининг Telegram-каналида янгиланган УАЗ Патриот йўлтанламасининг илк жонли суратларини эълон қилди. Инсайдер маълумотларига кўра, ушбу прототипнинг босиб ўтган масофаси бор-йўғи 200 километрни ташкил этади. Бу ҳақда Ixbt.com хабар беради.
Янги модел капоти остида 150 от кучига эга бўлган ЗМЗ Pro бензинли двигатели ўрнатилган. Шунингдек, харидорларга муқобил вариант сифатида 136 от кучини таъминлаб берувчи 2,0 литрли дизел двигатели ҳам таклиф этилиши кутилмоқда.
Автомобилнинг ички қисмидаги ўзгаришлар эътиборга лойиқ. ХаДмнинг таъкидлашича, янги УАЗ Патриот моделида олд ўриндиқларнинг кўп босқичли иситиш тизими, иситиладиган чарм рул, иқлим назорати (климат-контрол) ва махсус "ОФФ РОАД" режимини фаоллаштириш тугмаси мавжуд.
Экспертнинг қайд этишича, иқлим назорати тизими ҳозирда ҳатто AvtoVAZ моделларида ҳам учрамаётган ноёб функциялардан биридир. Янгиланган йўлтанламаснинг сотувлари жорий йилда бошланиши кутилмоқда, бироқ ҳозирча автомобил нархи бўйича расмий маълумотлар очиқланмаган.
“Zamin”ни Telegram'да ўқинг!
