Янги электромобиль Matiz Ўзбекистонда ишлаб чиқариладими? Расмий жавоб

Chevrolet яқин йилларда Хитойнинг Wuling Bingo Pro модели негизида янги ва ҳамёнбоп электромобиль ишлаб чиқариши мумкинлиги ҳақидаги хабарлар автомобиль ишқибозлари орасида катта қизиқиш уйғотди. Айниқса, мазкур модель келажакда айрим бозорларда Chevrolet Matiz’нинг замонавий электр вориси сифатида тақдим этилиши мумкинлиги ҳақидаги тахминлар кенг муҳокама қилинмоқда.

Wuling Bingo Pro — узунлиги 4 метрдан бироз ошадиган, беш эшикли ҳетчбек ҳисобланади. Автомобилнинг ғилдирак базаси 2560 миллиметрни ташкил этади. Модель олд ғилдиракларни ҳаракатлантирувчи 88 от кучига эга ягона электр мотор билан жиҳозланган бўлиб, шаҳар шароитида қулай ва иқтисодий ҳаракатланиш учун мўлжалланган.

Хитой бозорида ушбу автомобиль литий-темир-фосфат (LFP) туридаги батареяларнинг икки хил талқини билан таклиф этилмоқда. Улар мос равишда 31,9 ва 37,9 кВт/соат сиғимга эга. Bingo Pro 2026 йил баҳорида расман савдога чиқарилган бўлиб, унинг бошланғич нархи 58,8 минг юан, яъни тахминан 8,7 минг АҚШ долларини ташкил қилади. Ана шу жиҳати туфайли у ўз тоифасидаги энг арзон ва оммабоп электромобиллардан бири сифатида эътироф этилмоқда.

General Motors аввал ҳам Хитойда ишлаб чиқарилган Wuling ва Baojun моделларини Chevrolet бренди остида бошқа мамлакатлар бозорларига олиб чиқиш тажрибасига эга. Масалан, Лотин Америкаси учун ишлаб чиқилган электр Chevrolet Spark модели Baojun Ep Plus платформаси асосида яратилган. Шунингдек, электр Chevrolet Captiva эса Wuling Starlight S моделининг Chevrolet логотипи билан сотиладиган талқини ҳисобланади.

Бундай амалиёт илгари Ўзбекистонда ҳам қўлланган. Хусусан, бир неча йил аввал ишлаб чиқарилган иккинчи авлод Damas автомобили аслида Хитойнинг Wuling Hongguang V модели негизида яратилгани маълум.

Сўнгги кунларда ижтимоий тармоқларда янги электромобиль Ўзбекистонда ҳам Chevrolet Matiz’нинг замонавий электр вориси сифатида ишлаб чиқарилиши мумкинлиги ҳақида турли тахмин ва муҳокамалар пайдо бўлди. Бу хабарлар маҳаллий автомобиль ишқибозлари орасида катта қизиқиш уйғотганига қарамай, ҳозирча бу борада расмий қарор қабул қилинмаган.

“Ўзавтосаноат” масъулининг «Дарё» нашрига маълум қилишича, айни вақтда Wuling Bingo Pro негизидаги ушбу электромобилни Ўзбекистонда ишлаб чиқариш режалар қаторига киритилмаган. Шу боис ҳозирча мазкур лойиҳанинг мамлакатимизда амалга оширилиши ҳақидаги хабарлар ўз тасдиғини топмаган.

Ҳозирча Chevrolet компанияси Wuling Bingo Pro платформасида яратиладиган янги электромобилни қачон расман тақдим этиши ва уни қайси бозорларда сотишни режалаштираётгани ҳақида ҳам аниқ маълумот бермаган. Бироқ лойиҳа амалга ошса, ушбу модель ривожланаётган мамлакатлар учун Chevrolet брендининг энг арзон ва энг оммабоп электромобилларидан бирига айланиши мумкинлиги таъкидланмоқда. Бу эса келажакда электр транспорт воситалари бозорида рақобатнинг янада кучайишига хизмат қилиши мумкин.