Туркия Республика халқ партияси раҳбари, мухолифатдаги «Халқ коалицияси»дан президентликка номзод Камол Қиличдорўғли Россияни сайловолди фитналарини уюштирганликда айблади.
«Азиз рус дўстлар, кеча бу мамлакатда фош қилинган монтажлар, фитналар, Deep Fake контенти ва ёзувлари ортида сиз турибсиз. 15 майдан кейин ҳам дўстлигимизни давом эттирмоқчи бўлсангиз, Турк давлатидан қўлингизни тортинг. Биз ҳамон ҳамкорлик ва дўстлик тарафдоримиз», деб ёзди у ижтимоий тармоқда.
У мурожаатини турк ва рус тилида тақдим қилди.
Бир неча кун олдин Ражаб Тоййиб Эрдўған курд жангарилари етакчисининг Қиличдорўғлига овоз беришга чақирган видеосини намойиш этган эди.
«Террорчи ташкилотлар билан юрган Қиличдорўғлининг бу ватанни бўлиб ташлашига йўл қўймаймиз», деди Эрдоған.
Deutche Welle томонидан олиб борилган суриштирув видеони сохта эканини кўрсатди. Журналистлар видеонинг фони ва мазмуни бутунлай бошқача бўлган икки хил лавҳадан йиғилганини аниқлашди.
Қиличдорўғли Республика халқ партиясини (мамлакатдаги энг қадимги партия ва Эрдўған блокидан кейин парламентдаги иккинчи энг катта партия) бошқаради. Унинг номзоди 6 та партиядан иборат «Халқ альянси» томонидан кўрсатилган. Илгари сиёсатчи Россия ҳақида бундай кескин баёнотлар бермаган, аксинча, сайловда ғалаба қозонган тақдирда у билан ҳамкорлик қилишга тайёрлигини билдирган.
Социологларнинг қайд этишича, Туркиядаги президентлик сайловида тўрт нафар номзод иштирок этаётган бўлса-да, улардан фақат иккитаси – Эрдўған ва Қиличдорўғли ғалаба қозониш учун реал имкониятга эга.
Аввалроқ, Туркия президентлигига тўрт номзоддан бири, «Ватан» партияси раиси Муҳаррем Инже ўз номзодини қайтариб олган эди. У мухолифларни ўз обрўсига путур етказишда, жумладан, сохта порновидеоларни тарқатишда ва келиб чиқиши номаълум маблағларни ўғлининг ҳисобига ўтказишда айблади. Шундан сўнг, Қиличдорўғли уни мухолифат сафига қўшилишга чақирган эди.
Туркияда президентлик сайлови 14 май куни бўлиб ўтади.
“Замин” янгиликларини “Telegram”да кузатиб боринг
